خاتون جج اور پولیس کو دھمکیاں، عدالت نے عمران خان کی ضمانت منظور کر لی

اسلام آباد ہائیکورٹ نےخاتون جج اور پولیس کو دھمکیاں دینے کے الزام میں  چیئرمین پی ٹی آئی اور سابق وزیر اعظم عمران خان کی راہداری ضمانت منظور کر لی ہے۔

تفصیلات کے مطابق اسلام آباد ہائیکورٹ نے سابق وزیر اعظم عمران خان کی راہداری ضمانت 3 روز کیلئے منظور کی۔ عدالت میں مقدمے کی سماعت قائم مقام چیف جسٹس عامر فاروق کی سربراہی میں ڈویژن بینچ نے کی۔

یہ بھی پڑھیں:

آزاد کشمیر میں پاک فوج کی گاڑی کو حادثہ پیش آگیا، 9 جوان شہید

سماعت کے دوران عمران خان کے وکیل بابر اعوان نے دلائل دیتے ہوئے کہا کہ چیئرمین پی ٹی آئی انسدادِ دہشت گردی عدالت سے رجوع کریں گے، جسٹس محسن اختر کیانی نے کہا پٹیشن انٹرٹین نہیں ہوئی جس پر اعتراض ہے۔

وکیل بابر اعوان کا کہنا تھا کہ عمران خان کی رہائش گاہ بنی گالہ پولیس کے گھیراؤ میں ہے۔ سابق وزیر اعظم عدالت کیسے آئیں؟ بعد ازاں اسلام آباد ہائیکورٹ نے عمران خان کو اے ٹی سی سے رجوع کرنے کا حکم دیتے ہوئے 25اگست تک ضمانت منظور کر لی۔

ہائیکورٹ کے رجسٹرار آفس نے ضمانت قبل از گرفتاری کی درخواست پر 3 اعتراضات عائد کرتے ہوئے کہا کہ عمران خان نے بائیو میٹرک نہیں کرایا، انسدادِ دہشتگردی عدالت میں جانے کی بجائے ہائیکورٹ سے رجوع کیوں کیا؟

درخواست پر رجسٹرار آفس کی جانب سے دہشت گردی کے مقدمے کی مصدقہ نقل فراہم نہ کرنے کا اعتراض بھی اٹھایا گیا، تاہم عدالت نے عمران خان کی درخواستِ ضمانت سماعت کیلئے مقرر کرنے کے بعد فیصلہ بھی آج ہی سنا دیا ہے۔