گوگل نیوز پر ہمیں فالو کریںبھارت اور پاکستان کے درمیان فضائی محاذ آرائی کے حالیہ بیانات نے خطے میں کشیدگی کو مزید بڑھا دیا ہے۔بھارتی فضائیہ کے سربراہ نے 9 اگست کو دعویٰ کیا کہ آپریشن سندور کے دوران بھارتی فورسز نے پانچ پاکستانی جنگی طیارے اور ایک بڑا طیارہ مار گرایا جبکہ پاکستانی ایف 16 طیاروں کی ایک غیرمحدد تعداد کو زمین پر تباہ یا نقصان پہنچایا گیا۔ اس بیان پر بھارت کے ہی معروف دفاعی تجزیہ کار پروین ساہنی نے سنجیدہ سوالات اٹھا دیے۔
بھارتی صحافی کرن تھاپر کو انٹرویو دیتے ہوئے پروین ساہنی نے کہا کہ فضائیہ کے سربراہ کا یہ دعویٰ حقیقت کی کسوٹی پر پورا نہیں اترتا کیونکہ اس میں کئی واضح خلا موجود ہیں۔
ان کے بقول کہاں ہے اس کا ثبوت؟ انہوں نے مزید کہا کہ یہ بیان شاید کسی آخری وقت کی ہدایت پر دیا گیا ہو، تاہم یہ نہیں بتایا کہ یہ ہدایت کس نے دی۔
دوسری جانب پاکستان کے وزیر دفاع خواجہ محمد آصف نے بھی بھارتی دعوؤں کو سختی سے مسترد کرتے ہوئے انہیں بے بنیاد قرار دیا۔
قومی میڈیا اور سوشل پلیٹ فارم پر گفتگو کرتے ہوئے انہوں نے کہا کہ بھارت ایک بھی پاکستانی طیارہ گرانے میں کامیاب نہیں ہوا جبکہ پاکستان نے چھ بھارتی جنگی طیارے مار گرائے اور متعدد بھارتی فضائی اڈوں کو شدید نقصان پہنچایا۔
ان کا کہنا تھا کہ لائن آف کنٹرول پر بھارت کو بھاری نقصان ہوا مگر اس نے عوامی سطح پر تسلیم نہیں کیا۔
خواجہ آصف نے دونوں ممالک کو چیلنج دیا کہ اگر وہ سچ پر ہیں تو اپنے فضائی بیڑے کے ریکارڈ آزاد عالمی اداروں کے سامنے پیش کریں کیونکہ جھوٹ سے جنگیں نہیں جیتی جاتیں۔
انہوں نے خبردار کیا کہ پاکستان کی فضائی حدود کی کسی بھی خلاف ورزی کا فوری اور بھرپور جواب دیا جائے گا۔
دونوں ممالک اس وقت ایک دوسرے کی ایئرلائنز کے لیے فضائی حدود بند رکھے ہوئے ہیں، جو اس بات کی علامت ہے کہ جنوبی ایشیا میں الفاظ کی جنگ اور عسکری طاقت کا مظاہرہ کس قدر نازک توازن کا حامل ہے۔
