کراچی میں دہلی سے آنے والے بھارتی طیارے کی ہنگامی لینڈنگ

کراچی میں دہلی سے آنے والے بھارتی طیارے نے ہنگامی لینڈنگ کی ہے جس کے مسافروں کو پرواز سے اترنے کی اجازت نہیں دی گئی۔ طیارے پر 100 سے زائد مسافر سوار تھے۔

تفصیلات کے مطابق بھارتی ائیر لائن کی پرواز نمبر ایس جی 11 دارالحکومت نئی دہلی سے عرب امارات جاتے ہوئے فنی خرابی کا شکار ہو گئی۔ بوئنگ 737 کے پائلٹ نے پاکستانی ائیر کنٹرول حکام سے رابطہ کیا۔

یہ بھی پڑھیں:

لاہور سے قطر جانیوالی پرواز کی ہنگامی لینڈنگ

بھارتی طیارے کی جانب سے پاکستانی فضائی حدود میں ہنگامی لینڈنگ کی اجازت طلب کی گئی۔ ائیر کنٹرول کی جانب سے اجازت ملنے پر بھارتی پرواز نے کراچی میں ایمرجنسی لینڈنگ کامیابی سے کی۔

سول ایوی ایشن کے مطابق بھارتی طیارے کو رابطہ کرنے پر لینڈنگ کی اجازت انسانی ہمدردی کی بنیاد پر دی گئی تاہم طیارے کے کسی مسافر کو کراچی میں قدم رکھنے کی اجازت نہیں دی گئی۔ 

طیارے کی ہنگامی لینڈنگ کے باعث کراچی میں کسی جانی نقصان کی اطلاع نہیں ملی۔ طیارے پر سوار 100 سے زائد مسافر بھی ہنگامی لینڈنگ کے دوران محفوظ رہے۔ 

یاد رہے کہ اس سے قبل کراچی ائیرپورٹ پر غیرملکی ائیر لائن کی لاہور سے قطر جانے والی پرواز نے ہنگامی لینڈنگ کی جس کی وجہ طیارے میں پیدا ہونے والی فنی خرابی تھی۔

 لاہور سے قطری دارالحکومت دوحہ جانے والی قطر ائیر ویز کے پائلٹ نے گزشتہ ماہ کے دوران کراچی میں ہنگامی لینڈنگ کی تاہم عملے کے تمام اراکین اور مسافر محفوظ رہے۔