گوگل نیوز پر ہمیں فالو کریںوزرش انسانی جسم کو بہتر طریقے سے کام کرنے اور صحت مندرکھنے میں مددگار ثابت ہوتی ہے، اس کو پابندی سے کرنے سے انسان چاق و چوبند اور تندرست وتوانا رہتا ہے۔
لیکن اکثر یہ سوال کیا جاتا ہے کہ وزرش کے لیے کون سا وقت بہترین ہے۔ صبح کو ورزش کرنا زیادہ مفید ہے یا شام کو؟
سائنسدانوں کے مطابق اس بات کا انحصار کسی شخص کی ذاتی ترجیحات پر ہے۔ انہوں نے دونوں وقت کی ورزش کے مختلف فوائد بتائیں ہیں:
صبح کے وقت ورزش کے فوائد
تحقیق میں یہ بات سامنے آئی ہے کہ صبح کی ورزش تسلسل پیدا کرنے میں مددگار ثابت ہوتی ہے۔ اگر آپ صبح ورزش کرتے ہیں تو پورا دن آپ زیادہ متحرک رہیں گے، لیکن شام کو آپ تھک جائیں گے۔
جو شخص صبح کے وقت ورزش کرتا ہے وہ رات کو بھرپور نیند لیتا ہے۔صبح کی ورزش شام کی ورزش سے اس لحاظ سے بھی بہتر ہوتی ہے کہ صبح کے وقت جسم کی چربی زیادہ ختم ہوتی ہے، ایسا اس لیے ہوتا ہے کیونکہ صبح جسم چربی کو ورزش کے دوران ایندھن کی طرح استعمال کرتا ہے۔
سائنسدانوں کا کہنا ہے کہ جب آپ صبح سویرے ورزش کرتے ہیں تو آپ کا موڈ پورے دن بہت خوشگوار رہتا ہے اور آپ زیادہ تندہی اور توجہ سے کام کرتے ہیں۔
دوسری جانب سائنسدانوں نے صبح کی ورزش کے کچھ منفی پہلو بھی بتائے ہیں۔ صبح کی ورزش میں آپ کو بھوک محسوس ہوتی ہے۔ جسم کا درجہ حرارت کم ہوتا ہے اور وارم اپ ہونے میں وقت لگتا ہے۔ سب سے اہم یہ کہ کچھ لوگوں کو لگتا ہے کہ صبح ان کا انرجی لیول کم ہے۔
شام کے وقت ورزش
بعض ماہرین کا یہ خیال ہے کہ شام کو ورزش کرنا زیادہ بہتر ہے کیونکہ اس سے پٹھوں کی مضبوطی، لچک اور زیادہ طاقت پیدا ہوتی ہے۔ جسم زیادہ ٹیسٹوسٹیرونز پیدا کرتا ہے جس سے پٹھے مضبوط ہوتے ہیں۔
شام کو ورزش کرنے سے پورے دن کی تھکن ختم ہوجاتی ہے اور رات کو بہترنیند آتی ہے۔
سائنسدانوں کے خیال میں ورزش کا بہترین وقت وہ ہے جو آپ کو بہتر لگتا ہے، صبح یاشام سے کوئی فرق نہیں پڑتا بلکہ تسلسل کی ضرورت ہوتی ہے۔ صبح ورزش کریں یا شام کو، لیکن ایک بات طے ہے کہ ورزش ہمیں صحت مند بناتی ہے۔
