گوگل نیوز پر ہمیں فالو کریںاسلام آباد: پاکستان کرکٹ بورڈ میں ایک بار پھر قیادت کی تبدیلی متوقع ہے اور ذرائع کے مطابق محمد رضوان کو ون ڈے کپتانی سے ہٹانے کا فیصلہ کیا جا رہا ہے۔
اس عہدے کے لیے فاسٹ بولر شاہین شاہ آفریدی کا نام سب سے نمایاں ہے، جو ممکنہ طور پر پاکستان کی ون ڈے ٹیم کی نئی قیادت سنبھالیں گے۔
ذرائع کے مطابق پی سی بی کی اعلیٰ سطح میٹنگز میں مختلف فارمیٹس میں قیادت کی کارکردگی کا جائزہ لیا جا رہا ہے اور ون ڈے ٹیم کے مستقبل کے لیے نئے وژن پر غور جاری ہے۔ محمد رضوان کی قیادت میں ٹیم کی مجموعی کارکردگی کا تجزیہ کرنے کے بعد تبدیلی کی تجویز سامنے آئی ہے۔
شاہین آفریدی، جو اپنی جارحانہ حکمتِ عملی اور نوجوان کھلاڑیوں کی رہنمائی کے لیے مشہور ہیں، اس عہدے کے لیے سب سے مضبوط امیدوار بن کر سامنے آئے ہیں۔
انہوں نے ماضی میں پاکستان کی ٹی ٹوئنٹی ٹیم کی قیادت کرتے ہوئے اپنی قائدانہ صلاحیتوں کا مظاہرہ کیا تھا، جس پر شائقین اور ماہرین کرکٹ دونوں نے تعریف کی۔
ذرائع کے مطابق پاکستان کرکٹ بورڈ کی نیشنل سلیکشن کمیٹی آئندہ ہفتے جنوبی افریقہ کے خلاف سیریز کے لیے ون ڈے اور ٹی ٹوئنٹی اسکواڈ کا اعلان کرے گی۔
اس سیریز میں بیٹنگ لائن کی قیادت ایک بار پھر بابراعظم کے سپرد کی جا رہی ہے، جبکہ فاسٹ بولر نسیم شاہ بھی مکمل فٹ ہو کر ٹیم میں واپسی کر رہے ہیں۔
بابراعظم کی واپسی ٹیم کے لیے حوصلہ افزا ثابت ہوگی جو اوپننگ آرڈر میں تجربہ اور استحکام فراہم کرے گی۔ نسیم شاہ کی شمولیت سے پاکستان کی بولنگ لائن مزید مضبوط ہو جائے گی جس میں پہلے ہی حارث رؤف اور حسن علی جیسے تجربہ کار بولرز شامل ہیں۔
سلیکشن کمیٹی نے نوجوان کھلاڑیوں صائم ایوب اور محمد حارث پر اعتماد برقرار رکھا ہے، جنہوں نے گزشتہ سیریز میں متاثرکن کارکردگی دکھائی تاہم خوشدل شاہ اور حسین طلعت کو ٹیم سے ڈراپ کر دیا گیا ہے۔
ان کی جگہ آل راؤنڈر عرفان نیازی کو شامل کرنے کا امکان ہے جو اپنی پہلی بین الاقوامی ٹی ٹوئنٹی میچ میں پاکستان کی نمائندگی کریں گے۔
ذرائع کے مطابق سلیکشن کمیٹی نے اس بار اسکواڈ میں تجربے اور جوان توانائی کے امتزاج کو ترجیح دی ہے تاکہ ٹیم نہ صرف مضبوط بولنگ بلکہ متحرک بیٹنگ لائن کے ساتھ میدان میں اترے۔
