گوگل نیوز پر ہمیں فالو کریںاٹلی کی حکومت نے ایک نیا بل پیش کیا ہے جس کے تحت عوامی مقامات پر برقع اور نقاب پہننے پر مکمل پابندی عائد کی جائے گی۔
اس بل کا اطلاق اسکولوں، دفاتر اور دکانوں سمیت تمام عوامی جگہوں پر ہوگا۔ حکومتی ذرائع کے مطابق اس اقدام کا مقصد اسلامی علیحدگی پسندی کے بڑھتے رجحان کو روکنا، عوامی سلامتی کو یقینی بنانا اور سماجی شفافیت کو فروغ دینا ہے۔
مجوزہ قانون کے تحت اگر کوئی اس کی خلاف ورزی کرے گا تو اسے 300 سے 3000 یورو تک جرمانہ ادا کرنا پڑ سکتا ہے۔
حکومت کے اس فیصلے نے نہ صرف اٹلی بلکہ پورے یورپ میں ایک شدید بحث کو جنم دیا ہے۔
ناقدین کا کہنا ہے کہ یہ اقدام مذہبی آزادی اور ذاتی حقوق کی خلاف ورزی ہے، جبکہ حامیوں کا مؤقف ہے کہ یہ قانون سیکولر اصولوں اور قومی سلامتی کے تحفظ کے لیے ضروری ہے۔
یاد رہے کہ اٹلی اب ان یورپی ممالک کی صف میں شامل ہو گیا ہے جو مذہبی لباس سے متعلق قوانین پر از سر نو غور کر رہے ہیں۔
اس اقدام نے ایک بار پھر مذہبی آزادی، ثقافتی شناخت اور ریاستی سلامتی کے درمیان توازن کے حساس مسئلے کو یورپی عوامی بحث کا مرکز بنا دیا ہے۔
