ضمنی انتخابات سے قبل ہی ن لیگی رکنِ اسمبلی جلیل شرقپوری مستعفی

لاہور: پاکستان مسلم لیگ (ن) کے ناراض رکنِ پنجاب اسمبلی جلیل شرقپوری اپنے عہدے سے مستعفی ہو گئے ہیں۔ اسپیکر چوہدری پرویز الٰہی نے جلیل شرقپوری کا استعفیٰ منظور کر لیا۔

تفصیلات کے مطابق ن لیگی رکنِ اسمبلی جلیل شرق پوری کا کہنا ہے کہ میں نے ضمنی الیکشن سے قبل مستعفی ہونے کا فیصلہ حلقے کے کارکنان سے مشورے کے بعد کیا۔

یہ بھی پڑھیں:

 پنجاب کے 20حلقوں میں ضمنی الیکشن کا آغاز

سابق وزیر اعظم عمران خان کے متعلق جلیل شرقپوری نے کہا کہ میں چیئرمین پی ٹی آئی عمران خان کے ویژن کے ساتھ پہلے بھی تھا اور اب بھی ان کے ساتھ چلنا ہے۔

واضح رہے کہ آج ہونے والے ضمنی انتخابات پنجاب میں وزیر اعلیٰ کی نشست کے حوالے سے اہم قرار دئیے جارہے ہیں۔ جلیل شرقپوری کے مستعفی ہونے پر ن لیگی قیادت کو تشویش ہے۔ 

دوسری جانب پی ٹی آئی قیادت نے جلیل شرقپوری کے استعفے کو خوش آئند قرار دیا ہے۔ نارووال سے ن لیگی رکنِ اسملبی غیاث الدین بھی وزارتِ اعلیٰ کے امیدوار پرویز الٰہی کی حمایت کا اعلان کرچکے ہیں۔ 

قبل ازیں لاہور ہائیکورٹ کے فیصلے کے تحت پی ٹی آئی کے 20 منحرف اراکینِ اسمبلی کو ڈی سیٹ کردیا گیا تھا تاہم وزیر اعلیٰ کا انتخاب ضمنی انتخابات سے قبل منعقد کرانے پر تحریکِ انصاف نے تشویش کا اظہار کیا تھا۔