گوگل نیوز پر ہمیں فالو کریںکراچی کی بجلی سپلائی کمپنی کے الیکٹرک نے اپنے نظام میں شفافیت بڑھانے کیلئے ایک خصوصی مائیکرو سائٹ متعارف کرائی ہے، جس کے ذریعے صارفین اپنے علاقوں میں بجلی کی فراہمی اور بندش کی صورتحال سے متعلق تفصیلات معلوم کر سکتے ہیں۔
اس پورٹل کے ذریعے کے-الیکٹرک کے سروس والے علاقوں میں رہنے والے صارفین اب اپنے کے ای اکاؤنٹ نمبر کے ذریعے اپنے علاقے کے بجلی کے نیٹ ورک سے متعلق تازہ ترین معلومات حاصل کر سکتے ہیں۔ اس اقدام کا مقصد عوامی آگاہی کو فروغ دینا اور اجتماعی سطح پر جواب دہی کا شعور پیدا کرنا ہے۔
کے-الیکٹرک کے ترجمان کے مطابق یہ کوشش کمپنی کے اس مسلسل عزم کا حصہ ہے جس کا مقصد ذمہ دارانہ بجلی کے استعمال اور بروقت بلوں کی ادائیگی کو فروغ دینا ہے، تاکہ لوڈ شیڈنگ میں کمی لائی جا سکے۔ ترجمان نے مزید کہا کہ ہم چاہتے ہیں کہ لوگ اپنی بجلی کی فراہمی سے متعلق معلومات تک خود رسائی حاصل کریں۔ یہ کے-الیکٹرک اور عوام کے درمیان بہتر روابط کی طرف ایک قدم ہے۔
فی الحال کے-الیکٹرک کے فیڈر نیٹ ورک کا 70 فیصد حصہ لوڈ شیڈنگ سے مستثنیٰ ہے، جو نجکاری کے وقت صرف 6.6 فیصد تھا۔ ترجمان نے بتایا کہ باقی علاقوں میں اب بھی مسائل موجود ہیں، جن کی بنیادی وجوہات بجلی چوری اور عدم ادائیگی ہیں، جن کے تدارک کے لیے کے-الیکٹرک قانون نافذ کرنے والے اداروں کے تعاون سے براہ راست کارروائیاں جاری رکھے ہوئے ہے۔
جنوری 2025 سے اب تک کے-الیکٹرک 13,400 سے زائد انسدادِ چوری مہمات چلا چکا ہے، جن کے دوران تقریباً 171,298 کلوگرام غیرقانونی کنکشن (کنڈے) ہٹائے گئے۔ ان کارروائیوں کا مقصد معمول کی فراہمی کی بحالی اور قانونی بجلی کے استعمال کو فروغ دینا ہے۔
نیا آن لائن پلیٹ فارم معلوماتی مواد بھی فراہم کرتا ہے جو بجلی چوری کے قانونی خطرات کو اجاگر کرتا ہے اور speakup@ke.com.pk کے ذریعے گمنام رپورٹنگ کی سہولت بھی دیتا ہے۔ اس کے علاوہ صارفین کو یہ بھی بتایا گیا ہے کہ وہ اپنے علاقے کے فیڈر اسٹیٹس کو بہتر بنانے میں کس طرح کردار ادا کر سکتے ہیں، خاص طور پر بلوں کی باقاعدہ ادائیگی کے ذریعے۔
