گوگل نیوز پر ہمیں فالو کریںخیبر پختونخوا پولیس نے ہری پور کے علاقہ کھلابٹ ٹاؤن شپ میں شادی شدہ خاتون کے ساتھ اجتماعی جنسی زیادتی کے الزام میں پانچ ملزمان کو گرفتار کر لیا ہے۔
کھلابٹ ٹاؤن شپ پولیس کے مطابق متاثرہ خاتون افغان شہری ہے اور ابتدائی میڈیکل رپورٹ میں زیادتی کی تصدیق ہوئی ہے۔
پولیس کے مطابق 21 سالہ افغان مہاجر شکیلہ احمدی، جس کے پاس ویزا ہے، نے بیان دیا کہ اس کا شوہر بیرون ملک ہے اور وہ کھلابٹ ٹاؤن شپ کی نئی آبادی کے سیکٹر 3 میں کرائے کے مکان میں رہائش پذیر ہے۔
کھلابٹ ٹاؤن شپ کے ایس ایچ او انسپکٹر صدیق شاہ نے متاثرہ خاتون کے بیان کا حوالہ دیتے ہوئے کہا کہ وہ جمعرات کی شام (11 ستمبر) کو رشتہ داروں سے ملنے کیمپ نمبر 16 (افغان کیمپ) جا رہی تھی کہ اچانک ایک نوجوان نے اسے قابو میں کرکے مکئی کے کھیت میں لے گیا اور زبردستی اس سے زیادتی کی۔
خاتون نے مزید بتایا کہ جب وہ وہاں سے جانے کی تیاری کر رہی تھی تو ملزم کے مزید چار ساتھی بھی پہنچ گئے اور باری باری اس سے زیادتی کی۔ اس نے مزید کہا کہ جب اس نے مزاحمت کی تو ایک ملزم نے اسے تھپڑ اور مکے مارے جس سے اس کے چہرے اور ہونٹوں پر زخم آئے۔
متاثرہ خاتون نے ملزمان کی شناخت روزی، خان شیر، جاوید اور نصیر کے ناموں سے کی۔ تمام ملزمان بھی افغان مہاجر ہیں۔
ایس ایچ او صدیق شاہ کے مطابق ہری پور ٹراما سینٹر میں تیار کی گئی ابتدائی میڈیکل رپورٹ میں زیادتی کی تصدیق ہو گئی ہے، جبکہ تفصیلی فرانزک رپورٹ بعد میں موصول ہوگی۔
ان کا کہنا تھا کہ ملزمان کو حراست میں لے لیا گیا ہے اور پاکستان پینل کوڈ کی دفعہ 375A کے تحت مقدمہ درج کر لیا گیا ہے۔
ایس ایچ او کے مطابق ملزمان کو ہفتہ، 13 ستمبر کو ایریا مجسٹریٹ کی عدالت میں جسمانی ریمانڈ کے لیے پیش کیا جائے گا۔
