ملک کے مختلف شہروں میں بارش، کراچی کا درجہ حرارت 6 ڈگری تک گرنے کا امکان

کراچی: ملک میں موسلا دھار بارش نے کئی شہروں کو اپنی لپیٹ میں لے لیا،کراچی میں بارش کے بعد سردی بڑھ گئی،درجہ حرارت 6 ڈگری تک گرنے کا امکان ہے۔

محکمہ موسمیات نے آج کراچی میں موسلادھار بارش کاامکان مسترد کرتے ہوئے شہر میں ہلکی بارش کی پیش گوئی کی ہے۔ میگا سٹی میں گزشتہ رات گرج چمک کے ساتھ بارش ہوئی لیکن آج موسم خوشگوار رہنے کی توقع ہے۔

محکمہ موسمیات کا کہنا ہے کہ کراچی میں 8 جنوری کو درجہ حرارت 6 ڈگری سینٹی گریڈ تک گرنے کا امکان ہے جس کی وجہ سے شہر میں پہلے سے ہی سردی کی لہر بڑھ گئی ہے۔سکھر، حیدرآباد، شکارپور اور جیکب آباد میں موسلادھار بارش کی اطلاعات ہیں۔

دوسری جانب پنجاب، خیبر پختونخوا اور آزاد کشمیر کے کئی شہروں میں جمعہ کی صبح موسلا دھار بارش ہوئی جس سے معمولات زندگی درہم برہم ہو گیا۔

لاہور میں تقریباً پورے شہر میں صبح سویرے موسلا دھار بارش ہوئی جس سے پارہ کافی گر گیاجبکہ لیسکو کے متعدد فیڈر ٹرپ کرنے سے شہر کے متعدد علاقوں میں بجلی معطل ہوگئی۔

لاہورمیں پانچ کلومیٹر فی گھنٹہ کی رفتار سے ہوا چلنے کی بھی پیش گوئی کی گئی ہے اور نمی کا تناسب آج 93 فیصد کے قریب رہے گا۔

مزید پڑھیں:کراچی میں اومیکرون کے ساتھ ڈیلٹا ویرینٹ کا پھیلاؤ، ماہرین صحت نے خبردار کردیا

بارش کا یہ سلسلہ دن بھر جاری رہنے کا امکان ہے اور اگلے 24 گھنٹوں تک بادل چھائے رہنے کی پیش گوئی کی گئی ہے۔قصور، رائے ونڈ، حافظ آباد، نارووال، جہلم، خیبر، راولاکوٹ اور حویلی کہوٹہ میں بھی موسلادھار بارش ہوئی۔

آزاد کشمیر کے علاقے حویلی کہوٹہ میں مکان کی چھت گرنے سے ایک بچی جاں بحق جب کہ ضلع خیبر میں شدید بارش کے باعث مکان کی چھت گرنے سے دو بچوں سمیت چار افراد زخمی ہوگئے۔

موٹروے ایم تھری کو فیض پور لاہور سے درخانہ تک بند کر دیا گیا، موٹروے ایم 11 پر سفر کرنا ناممکن ہو گیا اور موٹروے ایم 2 کو بھی لاہور سے پنڈی بھٹیاں تک ٹریفک کے لیے بند کر دیا گیا۔