گوگل نیوز پر ہمیں فالو کریںقوم آج نشانِ حیدر کے حامل عظیم سپاہی حوالدار لالک جان شہید کو ان کے 26ویں یومِ شہادت کے موقع پر بھرپور خراجِ عقیدت پیش کر رہی ہے۔ حوالدار لالک جان نے دشمن کے خلاف بے مثال دلیری کا مظاہرہ کرتے ہوئے مادرِ وطن کے دفاع میں جامِ شہادت نوش کیا۔
اس موقع پر صدرِ پاکستان آصف علی زرداری، وزیراعظم شہباز شریف، فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی، چیف آف ایئر اسٹاف، نیول چیف اور پاکستان کی مسلح افواج نے لالک جان شہید کی جرات، قربانی اور حب الوطنی کو خراجِ عقیدت پیش کیا۔
یومِ شہادت کی مناسبت سے غذر میں واقع شہید کے مزار پر پھولوں کی چادر چڑھانے کی تقریب منعقد ہوئی جس کے مہمانِ خصوصی کمانڈر فورس کمانڈ ناردرن ایریا، میجر جنرل سید امتیاز حسین گیلانی تھے۔ اس موقع پر پاک فوج کے ایک چاق و چوبند دستے نے شہید کے مزار پر سلامی پیش کی۔
آئی ایس پی آر کے مطابق 7 جولائی 1999 کو کارگل جنگ کے دوران حوالدار لالک جان نے دشمن کی پیش قدمی کو جرات مندی سے روکا۔ شدید زخمی ہونے کے باوجود وہ اپنی پوسٹ پر ڈٹے رہے اور آخرکار دفاعِ وطن میں شہادت کا بلند مقام حاصل کیا۔
لالک جان کی قربانی نہ صرف افواجِ پاکستان بلکہ پوری قوم کے لیے ایک روشن مثال ہے۔ ان کی بہادری، حب الوطنی اور فرض شناسی آنے والی نسلوں کے لیے مشعلِ راہ ہے۔
