گوگل نیوز پر ہمیں فالو کریںکراچی: سندھ کے محکمہ تعلیم نے صوبے بھر کے اسکولوں میں اساتذہ کے لیے جامع ضابطہ اخلاق جاری کر دیا ہے۔
ضابطہ اخلاق کے مطابق خواتین اساتذہ کو زیادہ میک اپ کرنے اور اونچی ایڑھی والے جوتے پہننے سے گریز کرنے کا مشورہ دیا گیا ہے جبکہ مرد اساتذہ کے لیے ٹی شرٹ اور جینز جیسے غیر رسمی لباس پہننے کی حوصلہ شکنی کی گئی ہے۔
مزید برآں خواتین اساتذہ کو روایتی لباس اور کم سے کم زیورات استعمال کرنے کی ہدایت دی گئی ہے۔
محکمہ تعلیم نے یہ بھی واضح کیا کہ اساتذہ کو اسکول کی حدود میں منشیات، گٹکا، نسوار، ماوا استعمال کرنے یا سگریٹ نوشی کی سختی سے ممانعت ہوگی۔
اس کے علاوہ اساتذہ پر طلبہ کو ذاتی کاموں میں مشغول کرنے پر بھی پابندی عائد کر دی گئی ہے، تاکہ تعلیمی اور ذاتی امور کے درمیان واضح حد بندی برقرار رکھی جا سکے۔
اس سے قبل محکمہ تعلیم سندھ نے انکشاف کیا تھا کہ تقریباً 5000 جعلی اساتذہ تنخواہیں وصول کر رہے ہیں مگر تدریسی فرائض انجام نہیں دے رہے۔
رپورٹس کے مطابق وزیر تعلیم سندھ سید سردار علی شاہ نے ان جعلی ملازمین کو تنخواہوں کی فہرست سے نکالنے کے احکامات جاری کیے تھے۔ اس کے علاوہ ان اساتذہ کے خلاف محکمانہ کارروائی کی بھی منظوری دے دی گئی تھی۔
محکمہ تعلیم نے یہ بھی اعلان کیا کہ جعلی اساتذہ کو نکال کر، میرٹ لسٹ سے نئے اساتذہ کی بھرتی کی جائے گی۔
گزشتہ سال، محکمہ تعلیم نے تمام ضلعی تعلیمی افسران کو ہدایت دی تھی کہ وہ فوری طور پر 1000 سے زائد غیر حاضر اساتذہ کی تنخواہیں بند کر دیں۔
محکمہ تعلیم کی اسکرونٹی کمیٹی کی رپورٹ کے مطابق اکتوبر 2025 میں سندھ بھر میں 1000 اساتذہ اپنی ڈیوٹی سے غیر حاضر پائے گئے۔
یہ کمیٹی سندھ میں جعلی اساتذہ سے متعلق متعدد شکایات موصول ہونے کے بعد قائم کی گئی تھی تاکہ اس مسئلے کی چھان بین کی جا سکے۔
