گوگل نیوز پر ہمیں فالو کریںنیشنل ڈیٹا بیس اینڈ رجسٹریشن اتھارٹی (نادرا) نے بچوں کے رجسٹریشن سرٹیفکیٹ جسے عام طور پر بی فارم کہا جاتا ہے کے اجرا کے طریقہ کار میں نئی تبدیلیاں متعارف کروا دی ہیں۔
نئے نظام کے تحت والدین اب اپنے بچوں کے بی فارم کے لیے گھر بیٹھے ہی پاک آئی ڈی موبائل ایپ کے ذریعے درخواست جمع کروا سکتے ہیں جس سے نادرا رجسٹریشن مراکز پر ذاتی طور پر جانے کی ضرورت کافی حد تک کم ہو جائے گی۔
نادرا کے مطابق اس اقدام کا مقصد شہریوں کے لیے سہولت پیدا کرنا اور خاص طور پر دور دراز علاقوں میں رہنے والے خاندانوں کو آسان رسائی فراہم کرنا ہے۔ یہ تبدیلی ادارے کی وسیع ڈیجیٹل پالیسی کا حصہ ہے جس کا ہدف سرکاری خدمات کو تیز اور مؤثر بنانا ہے۔
درخواست دینے کے لیے والدین یا قانونی سرپرستوں کو پاک آئی ڈی ایپ میں اپنا پروفائل بنانا یا لنک کرنا ہوگا۔ اس کے بعد وہ بچے کی پیدائش کی تفصیلات، والدین کے شناختی کارڈ اور دیگر متعلقہ دستاویزات اپ لوڈ کر کے درخواست مکمل کر سکتے ہیں جن کی واضح تصاویر یا اسکین کا ہونا ضروری ہے۔
کچھ مخصوص کیسز میں نادرا اضافی تصدیق یا بایومیٹرک ویری فکیشن بھی طلب کر سکتا ہے جس کے لیے ایپ میں دی گئی ہدایات پر عمل کرنا ہوگا۔ درخواست منظور ہونے کے بعد والدین ڈیجیٹل کاپی ایپ سے حاصل کر سکتے ہیں جبکہ چاہیں تو پرنٹ شدہ سرٹیفکیٹ ڈاک کے ذریعے منگوا سکتے ہیں یا نادرا سینٹر سے وصول کر سکتے ہیں۔
یہ اپ ڈیٹ خاص طور پر ان والدین کے لیے اہم ہے جن کے بچے 10 سال کی عمر کے قریب پہنچ رہے ہیں کیونکہ اس مرحلے پر اکثر ریکارڈ کی جانچ یا اپ ڈیٹ کی ضرورت پیش آتی ہے۔ نادرا نے مشورہ دیا ہے کہ اہم تعلیمی یا انتظامی ڈیڈ لائنز سے پہلے درخواست جمع کروائی جائے تاکہ تاخیر سے بچا جا سکے۔
بی فارم کے اجرا کیلئے فیس معمولی رکھی گئی ہے تاہم یہ منتخب شدہ طریقہ ترسیل (ڈیجیٹل، ڈاک یا فوری سروس) کے مطابق مختلف ہو سکتی ہے۔ پروسیسنگ کا وقت بھی تصدیقی عمل کے مطابق بدل سکتا ہے تاہم پاک آئی ڈی ایپ کے ذریعے درخواستیں نسبتاً تیزی سے مکمل ہونے کی توقع ہے۔
نادرا نے اس نظام کے فوائد میں یہ بھی بتایا ہے کہ اب شہریوں کو لمبی قطاروں اور دفاتر کے چکر سے نجات ملے گی، درخواستوں کی پراسیسنگ میں تیزی آئے گی اور ڈیجیٹل ڈیٹا کی وجہ سے ریکارڈ کی درستگی بہتر ہوگی۔
ادارے نے خبردار کیا ہے کہ تمام معلومات درست فراہم کی جائیں اور کسی بھی غیر قانونی ایجنٹ سے بچا جائے کیونکہ درخواستیں صرف آفیشل پاک آئی ڈی ایپ یا مجاز مراکز کے ذریعے ہی جمع کرائی جائیں۔
ایسے افراد جو ایپ کے استعمال سے واقف نہیں ہیں ان کے لیے نادرا کی ویب سائٹ اور رجسٹریشن مراکز پر رہنمائی اور مدد بدستور دستیاب رہے گی۔
نوٹ: فیسوں اور پراسیسنگ ٹائم کی تازہ ترین تفصیلات کے لیے نادرا کی سرکاری ویب سائٹ یا قریبی مرکز سے رجوع کیا جائے۔
