گوگل نیوز پر ہمیں فالو کریںپشاور میں یونیورسٹی روڈ پر واقع کاؤنٹر ٹیررازم ڈیپارٹمنٹ (سی ٹی ڈی) کے پولیس اسٹیشن میں اتوار کے روز ایک زوردار دھماکے کے نتیجے میں ایک پولیس اہلکار جاں بحق جبکہ دو دیگر زخمی ہوگئے۔
پولیس حکام کے مطابق یہ دھماکہ تھانے کے اندر موجود دھماکہ خیز مواد کے پھٹنے سے ہوا، جس کے بعد عمارت میں آگ بھڑک اٹھی۔ آگ نے تیزی سے گودام کے حصے کو اپنی لپیٹ میں لے لیا اور تھانے کے کئی حصے متاثر ہوئے۔
سٹی پولیس چیف (سی سی پی او) میاں سعید نے تصدیق کی کہ دھماکے کے باعث عمارت کا ایک حصہ منہدم ہوگیا۔ ان کے مطابق ایک پولیس افسر موقع پر جاں بحق ہوگیا جبکہ دو اہلکار زخمی ہیں جنہیں فوری طور پر اسپتال منتقل کر دیا گیا ہے۔
دھماکے کے بعد پولیس کی بھاری نفری، ریسکیو ٹیمیں اور فائر بریگیڈ موقع پر پہنچ گئے۔ امدادی کارکنوں نے آگ پر قابو پانے اور ملبہ ہٹانے کا کام شروع کیا۔
موقع پر موجود عینی شاہدین کے مطابق دھماکے کے بعد تھانے سے گھنا دھواں بلند ہوا اور عمارت کے متاثرہ حصے میں کئی گھنٹوں تک آگ بھڑکتی رہی۔
واقعے کی تحقیقات شروع کر دی گئی ہیں تاکہ یہ معلوم کیا جا سکے کہ دھماکہ خیز مواد وہاں کس مقصد کے لیے رکھا گیا تھا اور آیا اس میں کوئی حفاظتی غفلت شامل تھی۔
