بلوچستان اور سندھ میں بارش سے تباہی، پاک بحریہ کا ریلیف آپریشن جاری

کراچی / کوئٹہ: صوبہ بلوچستان اور سندھ میں بارش سے متاثرہ علاقوں میں پاک بحریہ کا ریلیف آپریشن جاری ہے جبکہ سیلابی ریلوں اور بارش کے دوران مختلف حادثات کے دوران دونوں صوبوں میں درجنوں افراد جاں بحق ہوگئے۔

تفصیلات کے مطابق پاک بحریہ نے سندھ اور بلوچستان کے حالیہ بارش اور سیلاب کے دوران متاثر ہونے والے علاقوں میں ریلیف آپریشن جاری رکھا ہوا ہے۔ ترجمان پاک بحریہ نے ویڈیو جاری کردی۔

یہ بھی پڑھیں:

جمہوریت کیلئے ریاستی اداروں کا آئین کے تحت کام ضروری ہے، وزیراعظم

ترجمان پاک بحریہ کا کہنا ہے کہ زمینی راستوں کی بندش کے باعث پاک بحریہ کے ہیلی کاپٹرز نے بلوچستان کے ضلع لسبیلہ میں بارش سے متاثرہ عوام تک راشن اور دیگر ضروری سامان پہنچایا۔

پاک بحریہ کا کہنا ہے کہ فوجی جوانوں نے ریلیف آپریشن کے دوران سول انتظامیہ کی بھی مدد کی جبکہ آزمائش کی اس گھڑی میں پاک بحریہ عوام کو ہر ممکن امداد پہنچانے کیلئے پر عزم ہے۔ 

عوامی امداد سے متعلق پاک بحریہ کی جاری کردہ ویڈیو میں دیکھا جاسکتا ہے کہ فوجی جوان بارش سے متاثرہ علاقوں میں عوام تک راشن پہنچانے میں مصروف ہیں۔ متاثرین تک راشن پہنچانے کیلئے ہیلی کاپٹرز کو بھی استعمال کیا گیا۔ 

ویڈیو میں دیکھا جاسکتا ہے کہ بارش کے باعث وسیع پیمانے پر نقصان ہوا ہے اور بے شمار افراد کھلے آسمان تلے زندگی گزارنے پر مجبور ہیں۔ زمینی راستے منقطع ہوجانے کے باعث امدادی کارروائیوں میں مشکلات کا سامنا ہے۔