گوگل نیوز پر ہمیں فالو کریںپاکستان نے افغان طالبان کی درخواست پر آج شام چھ بجے سے اگلے 48 گھنٹوں کے لیے عارضی سیز فائر کرنے کا فیصلہ کیا ہے۔
دفتر خارجہ کے ترجمان کے مطابق اس دوران دونوں ممالک کے درمیان بات چیت کے ذریعے مستقل حل تلاش کرنے کی مخلصانہ کوشش کی جائے گی۔
ترجمان کا کہنا تھا کہ پاکستان امن و استحکام کے قیام کے لیے پرعزم ہے اور باہمی احترام اور سفارتی رابطوں کے ذریعے مسائل کے حل کو ترجیح دیتا ہے۔
دوسری جانب سیکورٹی ذرائع کے مطابق پاکستان فوج نے مہمند ضلع اور شمالی وزیرستان کے علاقے اباخیل میں دو الگ الگ کارروائیوں کے دوران مجموعی طور پر 37 دہشت گردوں کو ہلاک کیا۔
مہمند میں کارروائی ترکمنزئی سرحدی علاقے سے دراندازی کی کوشش کے دوران کی گئی، جہاں خوارج گروہ کے 30 شدت پسند مارے گئے۔
بتایا گیا کہ یہ گروہ افغانستان سے پاکستان میں دہشت گردی کی کارروائیاں کرنے کے لیے بھیجا گیا تھا۔ فوج کی بروقت اور فیصلہ کن کارروائی نے دشمن کے منصوبے ناکام بنا دیے۔
ذرائع کا کہنا ہے کہ افغان طالبان نے خوارج گروہ کی مدد سے ایک بڑی دراندازی کی کوشش کی تھی جسے پاکستانی افواج نے ناکام بنا دیا۔ فوج کے موثر ردعمل کے باعث افغان طالبان کو ایسی کارروائیوں کے لیے خوارج تنظیموں پر انحصار کرنا پڑا۔
اسی دوران شمالی وزیرستان کے علاقے اباخیل میں ایک اور آپریشن کے دوران سات دہشت گردوں کو ہلاک کیا گیا۔
سیکورٹی ذرائع کے مطابق یہ شدت پسند علاقے میں ایک بڑے حملے کی منصوبہ بندی کر رہے تھے۔ پاکستانی فوج کی بروقت کارروائی سے ایک بڑے سانحے کو روکا گیا۔
پاک فوج اور سیکورٹی اداروں نے واضح کیا ہے کہ ملک سے دہشت گردی کے خاتمے کے لیے آپریشنز جاری رہیں گے اور کسی بھی قیمت پر ملک کے امن و استحکام پر سمجھوتہ نہیں کیا جائے گا۔
