پاک بحریہ کے جہاز شمشیر کا ریجنل میری ٹائم سکیورٹی پٹرول کے تحت عمان کا دورہ

مسقط: پاک بحریہ کے جہاز شمشیر نے ریجنل میری ٹائم سکیورٹی پٹرول کے تحت عمان کا دورہ کیا ہے، اس موقعے پر پاکستان اور عمان کے حکام نے جہاز کا خیر مقدم کیا۔ 

تفصیلات کے مطابق پاک بحریہ کے جہاز شمشیر نے ریجنل میری ٹائم سیکیورٹی پٹرول پر تعیناتی کے دوران عمان کی بندرگاہ مسقط کا دورہ کیا۔ مسقط آمد پر عمان میں پاکستان کے سفیر اور رائل نیوی آف عمان کے حکام نے جہاز کا استقبال کیا۔

یہ بھی پڑھیں:

 صدرِ مملکت نے سینیٹ کا اجلاس 23 مئی کو طلب کر لیا 

دورے کے دوران پی این ایس شمشیر کے کمانڈنگ آفیسر نے کمانڈر سید بن سلطان نیول بیس اور رائل نیوی آف عمان کی ڈپٹی کمانڈنٹ نیول اکیڈمی سے ملاقات کی۔اس دوران باہمی دلچسپی کے امور پر گفت و شنید کی گئی۔

ڈپٹی کمانڈنٹ نیول اکیڈمی سے ملاقات کے دوران تمام شعبوں میں دوطرفہ تعلقات کو فروغ دینے کے عزم کا اعادہ کیا گیا۔ اس موقع پرنیول چیف ایڈمرل محمد امجد خان نیازی کا عمان کے عوام اور بحریہ کیلئے نیک خواہشات کا پیغام پہنچایا گیا۔

بندرگاہ کے دورے کے دوران پیشہ وارانہ امور پر مذاکرات اور دو طرفہ ملاقاتوں  اور پاک عمان دو طرفہ مشقوں کا انعقاد کیا گیا جن میں پیشہ وارانہ امور پر مذاکرات، مختلف تنصیبات کے دورے اور بحری جہاز پر سرچ اور سیژر ٹریننگ شامل ہیں۔

بعد ازاں دورے کے اختتام پر پی این ایس شمشیر نے دونوں ممالک کے مابین مشترکہ آپریشنز کے فروغ کے لیے رائل عمانی بحریہ کے جہاز خصّاب کے ساتھ دو طرفہ مشق میں حصہ لیا۔ترجمان پاک بحریہ کا کہنا ہے کہ پاک بحریہ سکیورٹی اور استحکام کیلئے پر عزم ہے۔