پاکستان ریلوے اور پی آئی اے نے کرایوں میں بڑی کمی کا اعلان کردیا

عالمی منڈی میں خام تیل کی قیمت میں کمی کے بعد پاکستان ریلوے اور پی آئی اے کی جانب سے کرایوں میں بڑی کمی کا اعلان کردیا گیا ہے۔

حکومت کی جانب سے پیٹرولیم مصنوعات کی قیمتوں میں کمی کے بعد ریلوے اور پی آئی اے کے کرایوں میں 10 فیصد کمی کا فیصلہ کیا گیا ہے۔ وفاقی وزیر برائے ریلوے اور ہوا بازی خواجہ سعد رفیق کا کہنا ہے کہ عوام کو پاکستان ریلوے کی اکانومی کلاس کے کرایوں میں رعایت دی جائے گی۔

پٹرولیم مصنوعات کی قیمتوں میں کمی کے بعد پاکستان ریلویز کی اکانومی کلاس اور پی آٸ اے کی اندرون ملک تمام پروازوں پر کرایوں میں 10 فی صد رعایت کا اعلان

انشا اللّٰہ آج رات بارہ بجے کے بعد عملدرآمد شروع ھو جائیگا pic.twitter.com/qzt2foOvmR

— Khawaja Saad Rafique (@KhSaad_Rafique) July 16, 2022

وفاقی وزیر کے مطابق پی آئی اے کی اندرون ملک تمام پروازوں کے کرایوں میں 10 فیصد کمی کا اعلان کیا گیا ہے جبکہ کرایوں میں کمی کا اطلاق آج بروز ہفتہ 16 جولائی کو رات 12 بجے سے اگلے 30 روز تک کے لیے ہوگا۔

خواجہ سعد رفیق کا کہنا ہے کہ نجی ائیرلائنز سے بھی اندرون ملک پروازوں کے کرایوں میں کمی کی درخواست کی جائے گی۔

ڈیزل کی قیمت میں کمی کے بعد ٹرینوں کے کرایوں میں 5 سے 10 فیصد کمی کا فیصلہ کیا گیا ہے۔

وفاقی وزیر سعد رفیق کے مطابق کرایوں میں کمی کا اطلاق ایکسپریس اور انٹر سٹی مسافر ٹرینوں پر ہوگا، جب کہ مال گاڑیوں کے فریٹ اور پارسل کے کرایوں میں بھی کمی ہوگی۔

یاد رہے کہ دو روز قبل وزیراعظم شہباز شریف نے پیٹرولیم مصنوعات کی قیمتوں میں کمی کا اعلان کرتے ہوئے بتایا کہ ڈیزل کی قیمت میں 40 روپے 54 پیسے جبکہ پیٹرول کی قیمت میں 18 روپے 50 پیسے فی لیٹر کمی کی گئی ہے۔