گوگل نیوز پر ہمیں فالو کریںپاکستان اور روس نے منگل کے روز باہمی تعلقات کو فروغ دینے کے لیے کراچی میں ایک نئی اسٹیل مل قائم کرنے پر اتفاق کیا ہے۔
یہ معاہدہ وزیرِاعظم کے معاونِ خصوصی ہارون اختر خان اور روسی نمائندے ڈینس نظروف کے درمیان ہونے والی ملاقات میں طے پایا۔
سرکاری اعلامیے کے مطابق ملاقات کا مرکزی موضوع پاکستان میں نئی اسٹیل ملز کے قیام پر بات چیت تھی۔
دونوں فریقین کے درمیان کراچی میں اسٹیل مل قائم کرنے کے لیے ممکنہ تعاون پر تفصیلی بات چیت ہوئی اور انہوں نے اس منصوبے کی ترقی اور نفاذ کے لیے ایک مشترکہ ورکنگ گروپ تشکیل دینے پر اتفاق کیا۔
ملاقات کے دوران ہارون اختر خان نے وزیرِاعظم کے اس وژن پر زور دیا کہ پاکستان میں سرمایہ کاری میں اضافہ کیا جائے۔
انہوں نے کہا کہ غیر ملکی سرمایہ کاروں کے لیے یہ بہترین وقت ہے کیونکہ پاکستان اب بین الاقوامی سرمایہ کاری اور کاروبار کے لیے ایک محفوظ اور مضبوط مرکز بن چکا ہے۔
انہوں نے مزید کہا کہ پاکستان اور روس کے درمیان اسٹیل انڈسٹری میں تعاون دونوں ممالک کے لیے فائدہ مند ثابت ہو سکتا ہے۔پاکستان ایک محفوظ اور ترقی پذیر سرمایہ کاری کا مرکز ہے، اور عالمی برادری نے اس کی صلاحیت کو تسلیم کیا ہے۔
ایس اے پی ایم نے تمام روسی تاجروں کو پاکستان میں سرمایہ کاری کے مواقع تلاش کرنے کی دعوت بھی دی۔
یہ ملاقات دونوں ممالک کے تعلقات کو مزید مضبوط بنانے اور اسٹیل جیسے کلیدی شعبوں میں مشترکہ منصوبوں کے نئے در وا کرنے کی جانب ایک اہم قدم قرار دی گئی ہے۔
