دُنیا بھر میں کورونا وائرس کے اعدادوشمار جاری کرنے والی ویب سائٹ ورلڈومیٹرز کے مطابق پاکستان ایک روز کے دوران نئے کورونا وائرس کیسز کے لحاظ سے دُنیا کا سب سےبڑا ملک بن گیا ہے۔

تفصیلات کے مطابق ورلڈومیٹرز نے کورونا وائرس کے نئے کیسز کے اعتبار سے ایک فہرست مرتب کی ہے جس میں پاکستان  میں گزشتہ 24 گھنٹوں میں رپورٹ کیے گئے کورونا وائرس کیسز کی تعداد دُنیا بھر میں سب سے زیادہ ظاہر کی گئی ہے۔

پاکستان میں گزشتہ 24 گھنٹوں کے دوران 4 ہزار 800 سے زائد کیسز رپورٹ کیے گئے جبکہ دوسرے نمبر پر سب سے زیادہ کیسز میکسیکو میں رپورٹ کیے گئے جہاں 3 ہزار 912 نئے کیسز ریکارڈ کیے گئے۔

بولیویا میں گزشتہ 24 گھنٹوں میں کورونا وائرس سے متاثرہ  647 جبکہ برازیل اور قازقستان میں بالترتیب 582 اور 271 نئے کیسز رپورٹ کیے گئے جو دنیا بھر میں چوتھے اور پانچویں نمبر پر موجو دہیں۔

برازیل اور میکسیکو میں گزشتہ 24 گھنٹوں کے دوران کورونا وائرس سے سب سے زیادہ اموات ہوئیں۔ برازیل میں 1 ہزار 349  جبکہ میکسیکو میں 1 ہزار 92 افراد وائرس کے باعث زندگی کی بازی ہار گئے۔

امریکا کورونا وائرس سے متاثرہ ممالک کی فہرست میں پہلے نمبر پر برقرار ہے جہاں وائرس کے باعث 82 ہزار 339 افراد لقمۂ اجل بن گئے۔