عمران کے آئی ایم ایف سے کئے معاہدے پر عمل نہ کیا تو ملک ڈیفالٹ ہو جائیگا، مریم

اسلام آباد: پاکستان مسلم لیگ ن کی نائب صدر مریم نواز نے کہا ہے کہ اگر موجودہ حکومت نے عمران خان کی حکومت کی جانب سے آئی ایم ایف کے معاہدے پر عمل نہیں کیا تو پاکستان ڈیفالٹ ہو جائے گا۔

اسلام آباد میں پریس کانفرنس کرتے ہوئے انہوں نے کہا کہ موجودہ حکومت نے پیٹرول کی قیمت یا ٹیکس میں ایک پیسہ بھی اپنی مرضی سے نہیں بڑھایا۔

انہوں نے مزید کہا کہ سابق حکومت نے انٹرنیشنل مانیٹری فنڈ (آئی ایم ایف) کے ساتھ معاہدے پر دستخط کیے تھے۔

انہوں نے کہا کہ روایتی طور پر سابق حکومتیں اقتدار چھوڑنے پر لوگوں کو اپنی کامیابیوں کے بارے میں بتاتی ہیں لیکن شیخ رشید کا حوالہ دیتے ہوئے کہا کہ سابق وزراء عوام کو بتاتے ہیں کہ عمران خان نے موجودہ حکومت کے لیے بارودی سرنگیں بچھا دیں۔

انہوں نے کہا کہ سابق حکومت کو معیشت کو چلانا نہیں آتا تھا لیکن جب انہوں نے اسے تباہ کیا اور پیسہ ختم ہوگیا تو انہوں نے پورے ملک اور اس کی معیشت کو خطرے میں ڈال کر آئی ایم ایف سے قرضہ لیا۔

مریم نے کہا کہ ”انہوں نے موجودہ حکومت کو ایسے فیصلے کرنے پر مجبور کیا کیونکہ وہ خان کے کئے گئے معاہدوں کی پابند ہے،” انہوں نے مزید کہا کہ عمران خان نے 2019 میں آئی ایم ایف کے ساتھ کیے گئے معاہدے میں لکھا تھا کہ پیٹرول پر سبسڈی ختم کردی جائے گی یا پیٹرول پر ڈیولپمنٹ لیوی بڑھائی جائے گی۔

انہوں نے کہا کہ اگر موجودہ حکومت نے معاہدے پر عمل نہیں کیا تو پاکستان ڈیفالٹ ہو جائے گا۔

مزید پڑھیں:وزیراعظم نے بڑھتی ہوئی پیٹرولیم مصنوعات کی قیمتوں کا ذمہ دار عمران خان کو ٹھہرادیا

انہوں نے کہا کہ جب عمران خان کو معلوم ہوا کہ ان کی حکومت مزید نہیں بچے گی تو انہوں نے پاکستان کو اتنا نقصان پہنچایا کہ اسے ٹھیک ہونے میں ایک سال نہیں تو مہینوں لگیں گے۔