پولیس کا سوات کے پہاڑی علاقوں میں عسکریت پسندوں کی موجودگی کا اعتراف

 سوات: خیبرپختونخوا پولیس نے ضلع سوات کے دور دراز پہاڑی علاقوں میں عسکریت پسندوں کی موجودگی کا اعتراف کیا ہے۔

تفصیلات کے مطابق سینٹرل پولیس آفس کی جانب سے جاری کردہ ایک مختصر بیان میں کہا گیا ہے کہ پولیس اس حقیقت سے اچھی طرح واقف ہے کہ سوات کے کچھ افراد جو پہلے افغانستان میں رہ رہے تھے سوات کے دور دراز پہاڑی علاقوں میں موجود ہیں۔

پولیس کے مطابق صورتحال مکمل طور پر سول انتظامیہ کے کنٹرول میں ہے اور تمام قانون نافذ کرنے والے ادارے کسی بھی مہم جوئی کا جواب دینے کے لیے تیار ہیں۔

واضح رہے کہ پولیس کا یہ بیان وزیراعلیٰ محمود خان کے آبائی شہر تحصیل مٹہ کے ایک دور دراز علاقے میں پولیس اور طالبان کے درمیان جھڑپ پر صوبائی حکومت کی کئی روز کی خاموشی کے بعد سامنے آیا ہے۔

مبینہ طور پر جھڑپ کے بعد ایک ڈی ایس پی اور کچھ سیکیورٹی اہلکاروں کو مشتبہ عسکریت پسندوں نے حراست میں لے لیا تھا جس کے بعد انہیں جرگے کی مداخلت پر رہا کیا گیا۔

یہ بھی پڑھیں:

حکومت نے میرا پاکستان میرا گھر اسکیم کے دوبارہ اجراء کا فیصلہ کرلیا

پولیس نے کہا کہ انہیں سوشل میڈیا پر گردش کرنے والی ویڈیو کلپس کا علم ہے جس میں سوات میں عسکریت پسندوں کی بھاری موجودگی کو دکھایا گیا ہے۔

انہوں نے کہا کہ ہم عوام کے اس خدشے سے بھی واقف ہیں کہ سوات 09-2008 کے دور میں واپس جاسکتا ہے جب عسکریت پسندوں نے اپنی شریعت کے ساتھ وادی پر حکومت کی تھی۔

پولیس نے کہا کہ سوات کے پرامن معاشرے میں دہشت گردی کے لیے کوئی جگہ نہیں ہے۔

پولیس نے اپنے بیان میں مزید کہا کہ مقامی آبادی کی امنگوں کے مطابق سوات میں امن کو یقینی بنانے کے لیے تمام ممکنہ اقدامات کا سہارا لیں گے۔

قبل ازیں جمعہ کو سوات بھر میں لوگوں کی بڑی تعداد سڑکوں پر نکل آئی اور حالیہ واقعے کے خلاف مظاہرہ کیا۔