کراچی، شاہ لطیف سے 3ملزمان گرفتار، 5 کلو چرس، 1 کلو سے زائد آئس برآمد

شہرِ قائد میں شاہ لطیف کے علاقے سے 3 ملزمان کو گرفتار کیا گیا ہے جن کے قبضے سے 5 کلو چرس اور 1 کلو سے زائد آئس برآمد ہوئی جبکہ ملزمان بین الصوبائی منشیات فروش گروہ کے کارندے ہیں۔

تفصیلات کے مطابق کراچی کے علاقے شاہ لطیف سے منشیات سپلائی کرنے والے بین الصوبائی منشیات فروش گروہ کے 3 کارندے گرفتار ہوئے۔ ایس ایس پی ملیر کا کہنا ہے کہ پولیس نے ملزمان سے بڑی مقدار میں منشیات اور نشہ آور ادویات برآمد کی ہیں۔

یہ بھی پڑھیں:

کراچی میں ایمبولینس کے ذریعے اسمگلنگ، منشیات برآمد، ملزم گرفتار

کراچی پولیس نے خفیہ اطلاع پر کارروائی کرتے ہوئے ملزمان کے قبضے سے 1 کلو سے زائد آئس، 5 کلو گرام چرس اور 120 گرام ہیروئن بھی برآمد کی جبکہ سکون آور گولیاں بھی تحویل میں لی گئیں۔ ملزمان ہیروئن میں ویلیم نامی نشہ آور گولیاں مکس کرتے تھے۔

گرفتار ملزمان ملک کے دیگر علاقوں سے منشیات لا کر کراچی میں سپلائی کرتے تھے۔ ملزمان کے موبائل فونز سے ان کے ساتھیوں کے بارے میں معلومات حاصل کی جارہی ہیں۔ ملزمان کی گرفتاری کے متعلق مراسلہ ملک کے دیگر صوبوں میں روانہ کردیا گیا ہے۔

ملزمان کے خلاف ضابطے کی کارروائی جاری ہے۔ ایس پی ملیر کا کہنا ہے کہ گرفتار ملزمان میں لطف اللہ، عبدالحمید اور موسم خان شامل ہیں۔ ملزمان کے قبضے سے برآمد کی گئی منشیات کو حسبِ ضابطہ تلف کردیا جائے گا۔ واقعے کا مقدمہ درج کر لیا گیا۔