پولیس سوشل ویلفیئر آرگنائزیشن کا اجلاس، شہداء کے مستحق خاندانوں میں راشن کی تقسیم پر غور

کراچی میں پولیس پبلک سوشل ویلفیئر آرگنائزیشن کا اہم اجلاس چیئرمین محمد جہانگیر کی زیر صدارت منعقد ہوا  ہے جس میں شہدائے سندھ پولیس کے مستحق خاندانوں میں راشن کی تقسیم پر غور کیا گیا۔

تفصیلات کے مطابق چیئرمین محمد جہانگیر کی زیر صدارت اجلاس میں صدر محمد احمد شمسی، جنرل سیکریٹری محمد عدنان ملک، لیگل ایڈوائزر ایڈووکیٹ خالد نواز خان مروت اور دیگر شریک ہوئے۔ شرکاء کو بتایا گیا کہ چیئرمین، صدر، جنرل سیکریٹری اور دیگر عہدیداران اپنی نگرانی میں راشن تقسیم کروا رہے ہیں۔

یہ بھی پڑھیں:

جامعہ کراچی دھماکہ، خودکش بمبار کی سی سی ٹی وی فوٹیج منظرِ عام پر آگئی

اجلاس کے دوران شرکاء کو بتایا گیا کہ شہدائے سندھ پولیس کے مستحق خاندانوں کی امداد کیلئے فنڈ عہدیداران اور دوستوں کی مدد سے مہیا کیا گیا۔ رمضان کے آغاز سے لے کر اب تک کئی سو خاندانوں تک راشن پہنچایا جاچکا ہے اور یہ سلسلہ عید تک جاری رہے گا۔ کراچی ٹریفک پولیس اور ایسٹ زون کے مستحق خاندانون میں راشن کی تقسیم مکمل ہوچکی ہے۔

شرکاء کو بتایا گیا کہ کراچی ساؤتھ اور ویسٹ زون  کیلئے راشن کا انتظام کیا جارہا ہے۔ چیئرمین محمد جہانگیر مغل نے آرگنائزیشن کے عہدیداران سے خطاب کرتے ہوئے کہا کہ عید کیلئے بھی شہداء کے اہلِ خانہ سے اظہارِ یکجہتی اور ان کی دلجوئی کیلئے پروگرام تیار کر لیا گیا ہے۔ ہم اپنے شہداء کو خوشی کے اس موقعے پر بھول نہیں سکتے جنہوں نے قانون کی بالادستی کیلئے جانوں کے نذرانے پیش کیے۔

صدر محمد احمد شمسی نے کہا کہ پولیس کے شہداء نے دہشت گردی کے خلاف لڑتے ہوئے وطنِ عزیز پر اپنی جانیں نچھاور کردیں، ایسے ہی لوگ ہمارے اصل ہیروز ہیں۔ جنرل سیکریٹری عدنان ملک نے کہا کہ عید کے حوالے سے آرگنائزیشن کا وفد شہداء کے گھروں میں عید ملن کیلئے جائے گا ۔ شہداء کے اہلِ خانہ میں عیدی اور تحفے تحائف بھی تقسیم کیے جائیں گے۔