صدر مملکت نے جسٹس عمر عطا بندیال کی بطور چیف جسٹس تعیناتی کی منظوری دے دی

اسلام آباد: صدر مملکت ڈاکٹر عارف علوی نے جسٹس عمر عطا بندیال کو پاکستان کے نئے چیف جسٹس کے طور پر تعینات کرنے کی منظوری دے دی ہے۔

صدر مملکت ڈاکٹر عارف علوی نے آئین کے آرٹیکل 175 اے کے تحت جسٹس عمر عطا بندیال کی بطور چیف جسٹس تقرری کی منظوری دی جبکہ جسٹس عمر عطا بندیال یکم فروری کو چیف جسٹس گلزار احمد کی ریٹائرمنٹ کے بعد 2 فروری کو اپنے عہدے کا چارج سنبھالیں گے۔

جسٹس عمر بندیال سپریم کورٹ کے سینئر ترین جج ہیں،وہ17 ستمبر 1958 کو لاہور میں پیدا ہوئے۔ انہوں نے اپنی ابتدائی اور ثانوی تعلیم کوہاٹ، راولپنڈی، پشاور اور لاہور کے مختلف اسکولوں میں حاصل کی۔

مزید پڑھیں:جسٹس گلزار یکم فروری کو سبکدوش، جسٹس عطاء بندیال نئے چیف جسٹس ہونگے

جسٹس عمر عطا بندیال نے 1983 میں لاہور ہائی کورٹ اور کچھ سال بعد سپریم کورٹ کے وکیل کے طور پر پریکٹس کی جس کے بعد 4 دسمبر 2004 کو لاہور ہائی کورٹ کے جج کے عہدے پر فائز ہوئے۔

انہوں نے نومبر 2007 میں عبوری آئینی حکم کے تحت حلف اٹھانے سے انکار کر دیا تھا لیکن ملک میں عدلیہ اور آئینی حکمرانی کی بحالی کے لیے وکلاء اور سول سوسائٹی کی تحریک کے نتیجے میں انہیں لاہور ہائی کورٹ کے جج کے طور پر بحال کر دیا گیا۔

بعد ازاں انہوں نے جون 2014 میں سپریم کورٹ کے جج کے طور پر اپنی ترقی تک لاہور ہائی کورٹ کے چیف جسٹس کے طور پر دو سال خدمات انجام دیں۔