گوگل نیوز پر ہمیں فالو کریںپاکستان تحریک انصاف کے رکن قومی اسمبلی زین قریشی کی اہلیہ ماہم کبیر نقاب پوش افراد کی طر ف سے مبینہ طور پر گھر کے قریب سے اغوا کے بعد جمعرات کو چند گھنٹوں بعد گھر واپس پہنچ گئیں۔
زین قریشی کی بہن مہر بانو قریشی نے سوشل میڈیا پلیٹ فارم ایکس پر بتایا کہ ان کی بھابھی کو نقاب پوش افراد نے اغوا کیا ہے۔
ماہم کبیر نے صبح 1:35 پر ایک ٹویٹ میں کہا، “الحمدللہ، میں بخیر و عافیت گھر پہنچ گئی ہوں۔ میں سب کا شکریہ ادا کرتی ہوں جنہوں نے میری خیریت کے لیے دعائیں کیں۔”
اس سے پہلے مہر بانو قریشی نے ٹویٹ میں کہا تھا کہ ان کی بھابھی کو کئی گاڑیوں اور سادہ لباس میں ملبوس نقاب پوش افراد نے ان کے گھر کے قریب سے زبردستی اٹھا لیا۔
انہوں نے مزید کہا کہ دو گاڑیوں نے ان کی گاڑی کو روکا اور انہیں زبردستی نکال کر لے گئے۔ “یہ لوگ اب ایسے کم درجے کے ہتھکنڈے اپنا رہے ہیں کیونکہ گزشتہ ڈیڑھ سال سے بے شمار دھمکیوں کے باوجود ہمیں جھکانے میں ناکام رہے ہیں۔”
انہوں نے مزید کہا، “میرا اور میرے خاندان کا اللہ پر ایمان اٹوٹ ہے۔ اللہ ہمیں اور پاکستان کو اس فسطائیت سے نکالے گا۔”
