گوگل نیوز پر ہمیں فالو کریںاسلام آباد: پاکستان تحریک انصاف (پی ٹی آئی) کے رہنماؤں نے عمران خان کی زمان پارک میں واقع رہائش گاہ پر پولیس آپریشن کی شدید مذمت کی ہے۔
لاہور میں پریس کانفرنس کرتے ہوئے پی ٹی آئی کے سینئر نائب صدر فواد چوہدری نے زور دے کر کہا کہ ان کی جماعت زمان پارک میں پولیس آپریشن کے خلاف ملک گیر احتجاج کرنے کے لیے تیار ہے۔
انہوں نے کہا کہ پارٹی کارکنان اور حامی عمران خان کی جانب سے زمان پارک میں ہونے والے آپریشن کے خلاف ملک بھر میں احتجاج کرنے کی کال کا انتظار کر رہے ہیں۔
فواد چوہدری نے کہا کہ پریس کانفرنس عمران خان کی رہائش گاہ پر ہونی تھی لیکن تمام راستے بند کر دیے گئے ہیں اور وہ وہاں نہیں پہنچ سکے۔ انہوں نے کہا کہ آئین کا آرٹیکل 15 واضح طور پر نقل و حرکت کی آزادی کی اجازت دیتا ہے۔
انہوں نے کہا کہ حکومت کو ملک کی کوئی فکر نہیں اور اس کا واحد ایجنڈا عمران خان کو گرفتار کرنا ہے۔ مہنگائی بڑھ رہی ہے، خارجہ اور اقتصادی پالیسی تباہ ہو چکی ہے لیکن فسطائی حکومت کو ایک چیز پریشان کر رہی ہے کہ عمران خان کو کیسے گرفتار کیا جائے؟
انہوں نے کہا کہ زمان پارک میں مظالم ڈھائے گئے اور گھر کے تقدس کو پامال کیا گیا۔
انہوں نے نشاندہی کی کہ آپریشن کے دوران عمران خان کی اہلیہ، بہنیں زمان پارک میں موجود تھیں۔ انہوں نے کہا کہ ان کے گھریلو عملے کے افراد کو تشدد کا نشانہ بنایا گیا اور پولیس گیٹ توڑ کر اندر داخل ہوئی۔
مزید پڑھیں:عمران خان کے لئے ریلیف کا جمعہ بازار لگا دیا گیا ہے، شرجیل میمن
فواد چوہدری نے کہا کہ پنجاب پولیس نے عدالتی احکامات کی خلاف ورزی کی کیونکہ پولیس اور پی ٹی آئی کے درمیان معاہدہ ہوا تھا۔
