کراچی کی مسلسل ہار کی ذمہ دار کمزور ٹیم ہے، بابراعظم نہیں۔راشد لطیف

لاہور: قومی ٹیم کے سابق کپتان اور وکٹ کیپر بیٹسمین راشد لطیف نے کہا ہے کہ کراچی کی مسلسل ہار کی ذمہ دار کمزور ٹیم ہے، موجودہ کپتان بابر اعظم نہیں۔

تفصیلات کے مطابق اپنے حالیہ انٹرویو کے دوران سابق کپتان راشد لطیف نے کہا کہ کراچی کنگز جو مسلسل شکست کھا رہی ہے، اس کا ذمہ دار بابر اعظم نہیں بلکہ ڈرافٹ میں ٹیم ہی کمزور منتخب ہوئی۔ فرنچائزز کو ڈرافٹ پر سنجیدگی کا مظاہرہ کرنا ہوگا۔

یہ بھی پڑھیں:

پی ایس ایل 7، لاہور کے خلاف میچ میں پشاور زلمی کے اہم کھلاڑی عدم دستیاب

انٹرویو کے دوران گفتگو کرتے ہوئے راشد لطیف نے کہا کہ کراچی کے علاوہ کوئٹہ کی ٹیم سیلیکشن میں بھی پیشہ ورانہ رویہ نہیں اپنایا گیا۔ کراچی کی ٹیم میں ٹاپ 3 کھلاڑیوں میں شرجیل خان ہی پاور ہٹر تھے، کوئی اور نہیں۔

گفتگو کے دوران سابق کپتان راشد لطیف نے کہا کہ پاکستان کی کپتانی اور فرنچائز میں بڑا فرق ہے۔ قومی ٹیم کا کپتان اپنی ٹیم بنانے کا اختیار رکھتا ہے۔ پی ایس ایل مین کوچ، مالکان اور دیگر کی موجودگی میں کپتان کی رائے کی اتنی اہمیت نہیں ہوتی۔

سابق کپتان راشد لطیف نے کہا کہ کپتان کو ٹیم کے ساتھ کھیلنا پڑتا ہے۔ بابر اعظم کی کپتانی پر کچھ نہیں کہوں گا۔ ڈرافٹ کے دن ہی کراچی بڑی کمزور ٹیم لگی۔ کپتان کے بڑا کھلاڑی ہونے کے ساتھ دیگر مسائل کامیاب نہیں ہونے دیتے۔

راشد لطیف نے کہا کہ محمد الیاس اور محمد عامر زخمی ہوئے۔ عماد وسیم کو شروع میں کورونا ہوا۔ کرس جورڈن نے آنے میں دیر کردی۔ شائقینِ کرکٹ کو پی ایس ایل کی بنیاد پر قائدانہ صلاحیتیں نہیں جانچنی چاہئیں۔ میں بابر اعظم کو مکمل سپورٹ کرتا ہوں۔