مئی کا مہینہ ملکی سیاست میں ہنگامہ خیز ہو گا، استعفے لیے اور دیے جاسکتے ہیں، شیخ رشید کی پیش گوئی

سابق وزیر داخلہ شیخ رشید کا کہنا ہے کہ مئی کا مہینہ ملکی سیاست میں ہنگامہ خیز ہو گا جس میں استعفے لیے یا دیے جا سکتے ہیں اور ملک کے مسائل کا واحد حل الیکشن میں رہ گیا ہے۔

سماجی رابطے کی ویب سائٹ ٹویٹر پر جاری پیغام میں سابو وزیر داخلہ نے کہا کہ پاکستان میں اگلا مہینہ عید کے بعد ہنگامہ خیز ہو گا، پیٹرول اور بجلی پر آئی ایم ایف کے دباؤ پر سبسڈی ختم کرنے سے حکومت اپنی سیاسی قبر کھودے گی۔

#امپورٹڈ_حکومت_نامنظور pic.twitter.com/Ro6H2MSngC

— Sheikh Rashid Ahmed (@ShkhRasheed) April 26, 2022

انہوں نے دعویٰ کیا کہ عمران خان روس سے 30فیصد سستی گیس، پیٹرول اور گندم لینے جا رہا تھا، اس اقدام سے ملک میں عوام کو بڑا ریلیف ملتا اور مہنگائی میں کمی آتی لیکن سامراجی سازش کے تحت عوام کو سستی گیس، پیٹرول اور گندم سے محروم کردیا گیا۔

شیخ رشید  کا کہنا تھا کہ پیٹرول پر سبسڈی ختم کرنے سے حکومت مخالف تحریک کو زبردست ایندھن فراہم ہو گا جو حکومت کو جلد ختم کردے گی۔

یہ بھی پڑھیں: کراچی یونیورسٹی کے چینی انسٹیٹیوٹ کے قریب گاڑی میں دھماکہ، 5افراد جاں بحق

انہوں نے کہا کہ مئی کا مہینہ سیاست میں ہنگامہ خیز ہو گا، استعفے بھی لیے جا سکتے ہیں اور دیے بھی جا سکتے ہیں، ملک کے مسائل کا واحد حل الیکشن میں رہ گیا ہے جسے جتنا جلدی کر لیا جائے اتنا ہی ملک کے لیے بہتر ہو گا۔

شیخ رشید کا یہ بیان ایک ایسے موقع پر سامنے آیا ہے جب وزیر خزانہ مفتاح اسماعیل نے آئی ایم ایف سے مذاکرات کے بعد کہا ہے کہ حکومت کو ملکی معیشت کو پٹڑی پر لانے اور آئی ایم ایف کے ساتھ تعطل کا شکار بیل آؤٹ پروگرام کو بحال کرنے کے لیے پیٹرولیم مصنوعات کی قیمتوں میں اضافہ کرنا پڑے گا۔