گوگل نیوز پر ہمیں فالو کریںملک میں سوشل میڈیا پر پابندی کے حوالے سے سینیٹ میں پیر کو قرارداد پر بحث شروع ہوگی جس کے بعد ملک میں سوشل میڈیا بند کرنے کے حوالے سے فیصلہ متوقع ہے۔
پاکستان پیپلز پارٹی کے سینیٹر بہرامند تنگی نے پارلیمنٹ کے ایوان بالا میں قرار داد پیش کی ہے جس میں معروف سوشل میڈیا پلیٹ فارمز، جن میں فیس بک، ٹک ٹاک، انسٹاگرام، ایکس اور یوٹیوب پر پابندی کا مطالبہ کیا گیا ہے۔
قرارداد پر 4 مارچ کو سینیٹ کے اجلاس میں بحث ہو گی۔پی پی سینیٹر نے سوشل میڈیا پلیٹ فارمز پر پابندی کی وکالت کرتے ہوئے “نوجوان نسل کو اس کے منفی اور تباہ کن اثرات سے محفوظ رکھنے” کی ضرورت پر زور دیا ہے۔
انہوں نے مزید کہا کہ یہ سوشل میڈیا پلیٹ فارمز ملک کی مذہبی اور ثقافتی اقدار کے منافی اصولوں کو فروغ دے رہے ہیں۔ سینیٹر تنگی نے ان پلیٹ فارمز پر زبان اور مذہب کی بنیاد پر لوگوں کے درمیان دشمنی کو ہوا دینے کا الزام بھی لگایا اور ان کے “افواج پاکستان کے خلاف منفی اور بدنیتی پر مبنی پروپیگنڈے” کے استعمال پر تشویش کا اظہار کیا۔
