پی ٹی آئی سینیٹر فیصل جاوید خان ڈرامہ سیریل پری زاد کے فین نکلے

اسلام آباد: پاکستان تحریکِ انصاف کے سینیٹر ڈرامہ سیریل پری زاد کے فین نکلے، فیصل جاوید خان نے ٹی وی سیریل کے مرکزی اداکار احمد علی اکبر سے ملاقات کی اور ان کی اداکاری کی کھل کر تعریف کی ہے۔

سماجی رابطے کی ویب سائٹ ٹوئٹر پر اپنے پیغام میں پی ٹی آئی کے سینیٹر فیصل جاوید خان نے کہا کہ ڈرامہ سیریل پری زاد کا مرکزی کردار اپنے پیچھے موجود فنکار سے زیادہ شہرت حاصل کر رہا ہے۔

یہ بھی پڑھیں:

پری زاد کی شہرت بھارت تک پہنچ گئی، بالی ووڈ اداکار بھی تعریف پر مجبور

ٹوئٹر پیغام میں سینیٹر فیصل جاوید خان نے کہا کہ پری زاد کی بے مثال شہرت احمد علی اکبر کی لاجواب اداکاری کا ثبوت ہے۔ بطور اداکار انہوں نے اپنی صلاحیتوں کا بھرپور مظاہرہ کیا اور کردار میں ڈھل کر دکھایا۔

A character getting more fame than the actor behind it,is a huge acknowledgement of an actor's outstanding performance. Such is the case with #AhmadAliAkbar as #Parizaad. His dynamite talent,acting perfectionism & transformative ability has earned him a merited acclaim. Welldone pic.twitter.com/OGV6Zh7Ayv

— Faisal Javed Khan (@FaisalJavedKhan) January 27, 2022

پیغام میں ڈرامہ سیریل پری زاد میں مرکزی کردار ادا کرنے والے فنکار کی اداکاری کو شاندار الفاظ میں خراجِ تحسین پیش کرتے ہوئے سینیٹر فیصل جاوید نے کہا کہ احمد علی اکبر نے بہترین اداکاری کے جوہر دکھائے۔

خیال رہے کہ ڈرامہ سیریل پری زاد میں احمد علی اکبر کی اداکاری کو پاکستان میں ہی نہیں بلکہ بھارت سمیت دنیا بھر میں اردو زبان سمجھنے والے ناظرین و سامعین نے سراہا اور ان کی بہت تعریف کی۔

قبل ازیں پاکستانی شوبز انڈسٹری کے معروف ڈرامہ نگار ہاشم ندیم کی تخلیق ڈرامہ سیریل پری زاد کی شہرت بھارت تک پہنچ گئی، بالی ووڈ اداکار وکرم کپاڈیہ بھی پری زاد کی تعریف پر مجبور ہوگئے۔

ڈرامہ سیریل پری زاد نے حال ہی میں پاکستان اور بھارت کے ناظرین و سامعین کی توجہ اپنی طرف کھینچ لی۔ گزشتہ برس وکرم کپاڈیہ نے ڈرامے میں حقیقت سے قریب اداکاری کی تعریف کی۔