گوگل نیوز پر ہمیں فالو کریںکراچی کے ابتر انفرااسٹرکچر پر شدید تنقید کے بعد سندھ حکومت نے بالآخر سڑکوں کی بحالی کا فیصلہ کرلیا ہے اور مرمت کے کام کے لیے 1.5 ارب روپے کی گرانٹ کی منظوری دے دی ہے۔
یہ فیصلہ وزیراعلیٰ مراد علی شاہ کی زیر صدارت صوبائی کابینہ کے اجلاس میں کیا گیا۔اجلاس کے دوران بریفنگ میں بتایا گیا کہ کراچی ڈویژن کے سات اضلاع کی سڑکوں کو پیچ ورک کے ذریعے مرمت کرنے کی ضرورت ہے۔
وزیراعلیٰ نے مون سون کی بارشوں کے بعد 2022 میں سندھ حکومت کی جانب سے تعمیر اور مرمت کی گئی سڑکوں کو پہنچنے والے نقصان پر عہدیداروں پر برہمی کا اظہار کیا۔
انہوں نے نقصانات کی وجوہات کے بارے میں پوچھتے ہوئے کہا کہ “حکومت کی جانب سے کراچی میٹروپولیٹن کارپوریشن اور کراچی ڈیولپمنٹ اتھارٹی کو سڑک کی مرمت کے لیے فنڈز فراہم کرنے کے باوجود، سڑک کی صورتحال کس طرح ابتر ہو گئی ہے”۔
اس کے جواب میں وزیر بلدیات سعید غنی نے کہا کہ ان کی وزارت “نقصان کے پیچھے وجوہات اور نقصان کے ذمہ داروں” کی تحقیقات کر رہی ہے۔
وزیراعلیٰ نے وزیر بلدیات کو ہدایت کی کہ اگر مقررہ وقت سے پہلے سڑکیں خراب ہوئیں تو ٹھیکیداروں کے خلاف انکوائری کی جائے۔
انہوں نے میئر کراچی مرتضیٰ وہاب کو فوری طور پر کام شروع کرنے کی ہدایت کرتے ہوئے کہا کہ “میں سروس لین اور ڈرینیج سسٹم کے ساتھ انتہائی معیاری سڑکیں چاہتا ہوں۔”
میئر مرتضیٰ وہاب نے اجلاس کو بتایا کہ کے ایم سی نے سڑکوں کی بحالی کے لیے پہلے ہی ٹینڈر جاری کر دیے ہیں۔
