1500ارب کا صوبائی بجٹ پیش کرنے کیلئے سندھ اسمبلی کا اجلاس آج ہوگا

کراچی: صوبائی بجٹ کیلئے سندھ اسمبلی کا اجلاس آج ہوگا، وزیرِ اعلیٰ و وزیرِ خزانہ سندھ سیّد مراد علی شاہ صوبے کا 1500 ارب روپے کا بجٹ پیش کریں گے۔

تفصیلات کے مطابق سندھ حکومت 1500 ارب کا بجٹ پیش کرے گی۔ اسپیکر آغا سراج درانی کی زیرِ صدارت سندھ اسمبلی اجلاس میں بجٹ کی تفصیلات اراکینِ اسمبلی کے سامنے رکھی جائیں گی۔ ترقیاتی منصوبوں کیلئے 300ارب روپے مختص کیے گئے ہیں۔

یہ بھی پڑھیں:

پنجاب حکومت اور اپوزیشن آمنے سامنے، بجٹ آج پیش کیا جائے گا

تجاویز کے مطابق سندھ کے صوبائی بجٹ میں سرکاری ملازمین کی تنخواہوں میں 15 فیصد تک اضافے کا امکان ہے۔ بجٹ میں کراچی میں ذرائع آمدورفت کی سہولیات میں اضافے کیلئے مزید 250 نئی بسیں خریدنے کی تجویز زیرِ غور ہے۔

صوبے کے تمام اضلاع میں سائنس میوزیم تعمیر کرنے کی تجویز پر بھی غور کیا جارہا ہے۔ سندھ کے بجٹ میں صحت، تعلیم اور دیگر شعبہ جات پر اربوں روپے خرچ کیے جائیں گے۔ وزیر اعلیٰ مراد علی شاہ بجٹ کی تفصیلات سے اراکین کو آگاہ کرینگے۔ 

دوسری جانب وزیر اعلیٰ حمزہ شہباز کی زیرِ قیادت پنجاب حکومت اور اپوزیشن آمنے سامنے آگئے۔ اویس لغاری صوبہ پنجاب کا  بجٹ آج پیش کریں گے جبکہ گزشتہ روز کا بجٹ اجلاس حکومت اپوزیشن ہنگامہ آرائی کی نذر ہوگیا۔

گزشتہ روز بجٹ اجلاس کو منگل کی دوپہر ایک بجے تک ملتوی کردیا گیا تھا۔ کئی گھنٹوں کی تاخیر کے بعد بھی بجٹ پیش نہیں ہوسکا۔ گزشتہ روز بجٹ اجلاس دوپہر 2بجے شروع ہونا تھا۔ اپوزیشن نے عطاء اللہ تارڑ کی موجودگی پر اعتراض کیا تھا۔