سپریم کورٹ کا پی ای سی ایچ ایس میں تمام غیر قانونی گھر گرانے حکم، مکینوں میں خوف و ہراس

کراچی:سپریم کورٹ کا گرین بیلٹ پر قبضے سے متعلق بڑا فیصلہ، عدالت نے پی ای سی ایچ ایس بلاک 6 کی گرین بیلٹ مکمل کلیئر کرانے اور تعمیر تمام گھر بھی گرانے کا حکم دیدیا۔

منگل کوسپریم کورٹ کراچی رجسٹری میں چیف جسٹس آف پاکستان کی سربراہی میں تین رکنی بینچ نے پی ای سی ایچ ایس میں گرین بیلٹ پر کے الیکٹرک کے گرڈ اسٹیشن بنانے سے متعلق رہائشیوں کی جانب سے کے الیکٹرک کیخلاف درخواست کی سماعت کی۔

دوران سماعت جسٹس اعجاز الاحسن نے ریمارکس دیئے آپ یہ بتائیں، آپ کے گھر بھی تو گرین بیلٹ پر ہیں۔ درخواست گزاروں کے وکیل شعاع النبی ایڈووکیٹ نے موقف دیا یہ ہمارا کیس ہی نہیں۔ ہمارا کیس یہ ہے کہ سوسائٹی نے رفاعی پلاٹ کے الیکٹرک کو دے دیاہے۔

مزید پڑھیں:

کراچی کی تباہی برسوں کا نوحہ

سپریم کورٹ کا نسلہ ٹاور ایک ہفتے میں گرانے کا حکم

نسلہ ٹاور گرانے کیلئے کمشنر کراچی متحرک، یوٹیلٹی کنکشن منقطع، رہائشی سراپا احتجاج

تمام حکم امتناع ختم ،سپریم کورٹ کاجعلی لیز پر قائم تعمیرات گرانے کا فیصلہ

چیف جسٹس گلزار احمد نے برہمی کا اظہار کرتے ہوئے ریمارکس دیئے کہ کیا آپ عدالت کلین ہیڈز کے ساتھ آئے؟ آپ کے اپنے گھر بھی تو گرین بیلٹ پر ہیں۔ چیف جسٹس نے استفسار کیا پی ای سی ایچ ایس کی جانب سے کون پیش ہوا؟ ۔

چیف جسٹس گلزار احمد نے ریمارکس دیئے کہ پی ای سی ایچ ایس سوسائٹی نے تو پوری سوسائٹی کے رفاعی پلاٹ بیچ ڈالے۔ کے الیکٹرک پرائیوٹ کاروبار کررہی ہے جگہ کہیں اور لے۔ رہائشی بھی کلین ہیڈز نہیں آئے لہٰذا ان کے گھر بھی گرائے جائیں۔

عدالت نے کے الیکٹرک گرڈ اسٹیشن کو بھی ختم کرنے اوربلاک 6 کے رفاعی پلاٹ پر پارک کو اصل حالت میں بحال کرنے کا حکم دیاجبکہ کے الیکٹرک، رہائشیوں اور پی ای سی ایس ایچ سوسائٹی کو نوٹس بھی جاری کرکے آئندہ سیشن تک سماعت ملتوی کردی۔