گوگل نیوز پر ہمیں فالو کریںسڈنی میں 29 سالہ شخص کو مبینہ طور پر اپنی بیوی اور بچوں کو بغیر سفری دستاویزات پاکستان میں اکیلے چھوڑ کر آسٹریلیا واپس جانے پر 12 سال تک قید کی سزاء ملنے کا امکان ہے۔
حکام کا دعویٰ ہے کہ 29 سالہ علی رحیمی نے اپنی بیوی کو سفر کی نوعیت کے بارے میں گمراہ کیا اور اسے بتایا کہ وہ اس کے خاندان سے ملنے کے لیے پاکستان جا رہے ہیں۔ نومبر میں خاتون کے گھر واپسی کے لیے ضروری کاغذی کارروائی کے بغیر پاکستان میں پھنسے رہنے کی اطلاع کے بعد تحقیقات کا آغاز کیا گیا۔
آسٹریلوی فیڈرل پولیس (اے ایف پی) کے مطابق اس شخص نے مبینہ طور پر پاکستان جانے سے پہلے جولائی 2023 میں افغانستان کے دورے کے دوران خاندان کے تمام ٹکٹ، پاسپورٹ، ویزا اور دیگر سفری دستاویزات کا کنٹرول اپنے پاس رکھا تھا۔
پاکستان پہنچنے پر شوہر نے مبینہ طور پر اپنی بیوی کو بتایا کہ وہ دوستوں سے ملنے افغانستان واپس جا رہا ہے لیکن دو ماہ بعد خاتون کو پتہ چلا کہ وہ اکیلا ہی آسٹریلیا واپس چلا گیا ہے۔
اے ایف پی نے آبرن کے علاقے میں اس شخص کے گھر پر چھاپہ مارا اور اس پر دھوکہ دہی کے استعمال میں شامل ایک ایگزٹ اسمگلنگ کا الزام لگایا۔ جرم ثابت ہونے پر اسے 12 سال قید کی سزا ہو سکتی ہے۔
