ڈاکیے اور راج ہنس کی 37 سالہ دوستی نے مثال قائم کردی

استنبول: یہ کوئی بنائی ہوئی کہانی نہیں بلکہ ترکی میں رہنے والے ایک بوڑھے ڈاکیے کا سچا واقعہ ہے،جس میں ایک راج ہنس (سوان) سے دوستی کو آج 37 سال ہوچکے ہیں اور دونوں ہی ایک دوسرے کے ساتھ دوستی کو نبھا رہے ہیں۔

تفصیلات کے مطابق آج سے 37 سال پہلے، ترکی کے مغربی صوبے ایدرنے میں رجب مرزان نامی ایک نوجوان ڈاکیے کو ایک ننھا منا راج ہنس ملا جو زخمی تھا۔جس کو اس نے طبی امداد فراہم کی اور اپنے ساتھ رکھ لیا۔

بے اولاد رجب مرزان کی شریک حیات فوت ہوچکی تھی،لیکن اس نے دوسری شادی نہیں کی تھی۔ وہ اس راج ہنس کو اٹھا کر لے آیا اور علاج کروانے کے بعد اسے پال لیا۔ راج ہنس کا نام اس نے ”غریب“ رکھ لیا۔

اُس دن سے رجب مرزان اس راج ہنس کا بالکل اسی طرح خیال رکھتا ہے جیسے وہ اس کی اپنی سگی اولاد ہو۔”غریب“ راج ہنس پچھلے 37 سال سے رجب مرزان کے کھیت پر، اس کے ساتھ ہی رہ رہا ہے۔

دونوں ہی ایک دوسرے سے اس قدر مانوس ہیں کہ اکثر وہ ایک ساتھ ہی نظر آتے ہیں چاہے وہ چہل قدمی کر رہے ہوں یا پھر بازار میں کہیں گھوم پھر رہے ہوں۔

ویسے تو راج ہنس (سوان) عام طور پر صرف 12 سال تک ہی زندہ رہتے ہیں لیکن رجب مرزان نے ”غریب“ کا اتنا خیال رکھا ہے کہ آج وہ 37 سال کا ہونے کے باوجود صحت مند ہے۔

ویسے تو دوسرے جانوروں کی انسانوں سے دوستی کے قصے مشہور ہیں لیکن رجب مرزان اور ”غریب“ میں دوستی کی یہ کہانی آج نہ صرف ترکی میں بلکہ دنیا بھر میں مقبول ہوچکی ہے؛ اور سوشل میڈیا پر اس کے خوب چرچے بھی ہیں۔