وزیراعظم نے پنجاب کے اسپتالوں میں ادویات کی مفت فراہمی پر تجاویز طلب کرلیں

اسلام آباد: وزیراعظم شہباز شریف نے پنجاب کے تمام اسپتالوں میں ادویات کی مفت فراہمی مریضوں تک یقینی بنانے سے متعلق تجاویز  طلب کرلیں۔

تفصیلات کے مطابق وزیراعظم شہباز شریف کی زیر صدارت ماڈل ٹاؤن لاہور میں اجلاس ہوا، اس موقع پر وزیراعظم نے کہا کہ پاکستان کڈنی اینڈ لیور اسپتال میں غریبوں کا مفت علاج کیا جائے۔

وزیراعظم شہباز شریف کی زیر صدارت اس اجلاس میں  اجلاس میں چیف سیکرٹری پنجاب کامران افضل، سابق وزیر صحت خواجہ سلمان رفیق ،خواجہ عمران نذیر اور پنجاب کے محکمہ صحت کے افسران نے  بھی شرکت کی۔

وزیراعظم نے چیف سیکرٹری کو عید کے بعد عوام تک سستے آٹے کی فراہمی یقینی بنانے کی ہدایت بھی کی۔

یہ بھی پڑھیں: عید الفطر کے موقع پر ملک میں ایک مرتبہ پھر چاند کو لے کر اختلافات سامنے آگئے

 دوسری جانب نیب لاہور نے ایک اعلامیے میں سابق خاتون اول بشری بی بی کی دوست فرح خان سے متعلق انکوائری پر آئینی و قانونی دائرہ اختیار کے حوالے سے وضاحت جاری کرتے ہوئے کہا ہے کہ نیب کسی بھی پبلک آفس ہولڈریا اس  کے اہل خانہ کے خلاف آمدن سے زائد اثاثہ جات پر قانون کے مطابق انکوائری کرسکتا ہے۔

نیب ترجمان کا کہنا ہے کہ فرح خان کے شوہراحسن جمیل گجر 1997 سے 1999 تک بطور چیئرمین ضلع کونسل گوجرانوالہ قومی عہدہ پر رہے،  آئین کے مطابق سابق عہدے دار یا انکے اہلخانہ کے خلاف کرپشن و مالی بدعنوانی کی شکایات نیب کے دائرہ اختیار میں آتی ہیں۔