گوگل نیوز پر ہمیں فالو کریںجاپان میں متعدد اسنیک مصنوعات کی پیکنگ اب سیاہ و سفید شکل اختیار کر رہی ہے کیونکہ ایران میں جاری جنگ کے اثرات نے روشنائی (انک) کی سپلائی کو متاثر کر دیا ہے۔ اس صورتحال نے ایسے اجزا کی کمی پیدا کر دی ہے جو رنگین پرنٹنگ میں استعمال ہوتے ہیں جس کے باعث کمپنیوں کو اپنے ڈیزائن سادہ کرنے پڑ رہے ہیں۔
یہ تبدیلی دراصل اس بڑے بحران کا نتیجہ ہے جو آبنائے ہرمز کے موثر طور پر بند ہونے کے بعد پیدا ہوا جو ایران میں جنگ کے باعث ہوا ہے۔ اس تنازع نے عالمی سطح پر تیل سمیت کئی اشیاء کی قیمتوں میں اضافہ کیا ہے اور سپلائی چین میں بھی واضح رکاوٹیں پیدا کر دی ہیں۔
ٹوکیو کی معروف کمپنی کالبی (Calbee Inc) جو آلو کے چپس اور سیریلز بناتی ہے نے واضح کیا ہے کہ پیکنگ بدلنے کے باوجود اندر موجود مصنوعات میں کوئی تبدیلی نہیں کی گئی۔ یہ کمپنی جاپان کے کنوینیئنس اسٹورز میں بڑی مقدار میں دستیاب ہے اور اپنی مصنوعات امریکہ، چین اور آسٹریلیا تک بھی برآمد کرتی ہے۔
کمپنی کے مطابق یہ قدم اس لیے اٹھایا گیا ہے تاکہ مصنوعات کی سپلائی کو مستحکم رکھا جا سکے۔ ان کے مطابق 14 مختلف مصنوعات کی پیکنگ 25 مئی سے تبدیل کی جائے گی اور اب ڈیزائن میں صرف دو رنگ استعمال کیے جائیں گے تاکہ موجودہ جغرافیائی اور معاشی حالات کے مطابق لچک دکھائی جا سکے۔
کالبی نے بتایا ہے کہ ابھی یہ واضح نہیں کہ یہ تبدیلی کتنے عرصے تک برقرار رہے گی۔ 1949 میں قائم ہونے والی اس کمپنی میں 5,000 سے زائد ملازمین کام کرتے ہیں اور یہ موجودہ عالمی غیر یقینی صورتحال کے مطابق اپنے فیصلے جاری رکھے ہوئے ہے۔
جاپان تقریباً مکمل طور پر تیل کی درآمدات پر انحصار کرتا ہے اور تیل سے جڑی ایک اہم شے نافیتھا مختلف مصنوعات جیسے پلاسٹک اور روشنائی کی تیاری میں استعمال ہوتی ہے۔ اگرچہ حکومت نے اپنے ذخائر کا حوالہ دیتے ہوئے عوامی خدشات کم کرنے کی کوشش کی ہے لیکن اس کے باوجود پیکنگ میں آنے والی یہ واضح تبدیلی صورتحال کی سنگینی کو ظاہر کرتی ہے۔
