گوگل نیوز پر ہمیں فالو کریںپنجاب کے شہر گجرات سے ایک افسوسناک واقعہ سامنے آیا ہے جہاں چند ٹرانسپورٹ مافیا کے افراد نے پاکستان ریلوے کے ایک ملازم سے بدسلوکی اور اسے تشدد کا نشانہ کیا۔ سوشل میڈیا پر وائرل ہونے والی ویڈیو میں دیکھا جا سکتا ہے کہ ٹرین کی آمد کے وقت ریلوے ملازم نے حفاظتی وجہ سے پھاٹک بند کر دیا تھا۔ اس بات پر مافیا سے تعلق رکھنے دکھائی دینے والے افراد نے اسے زبردستی دروازہ کھولنے پر مجبور کرنے کی کوشش کی اور جب ملازم نے ٹرین آنے کی صورت میں ممکنہ خطرے کی نشاندہی کی تو انھیں مار پیٹ کا نشانہ بنایا گیا۔
عینی شاہدین کے مطابق ٹرانسپورٹ مافیا والوں نے دباؤ ڈالا کہ پھاٹک فوراً کھولو تاکہ وہ اپنی گاڑیاں جلدی کراس کر سکیں مگر ریلوے ملازم نے ٹرین کی آمد کی وجہ سے خطرے سے آگاہ کرتے ہوئے دروازہ بند رکھنے کی وجہ بتائی۔ یہی بات تنازع کا باعث بنی اور چند منٹ میں معاملہ تشدد تک پہنچ گیا۔
گجرات
ہمارے ملک میں ہر طاقتور فرعون کا اپنا ہی قانون ہے
ریلوے ملازم کا پھاٹک بند کرنا جرم بن گیا،بس مالکان کا زبردستی ٹرین رکوانے کی کوشش۔ pic.twitter.com/sb57nqawZ3— Shakil Bashir (@ShakilSidhu1) October 28, 2025
سوشل میڈیا صارفین نے اس واقعے پر زبردست غم و غصہ کا اظہار کیا ہے۔ شہریوں کا کہنا ہے یہاں ہر شخص ہی فرعون بنا ہوا ہے اور اپنی مرضی سے نظام چلانے کی کوشش کرتا ہے اور طاقتور افراد قانون کو پامال کر رہے ہیں۔
ایک صارف نے تنقید کی کہ اگر اسی موقع پر ٹرین نہ آئی ہوتی تو الزام ملازم پر رکھا جاتا کہ وہ بنا وجہ دروازہ بند کر کے لوگوں کا وقت ضائع کر رہا تھا اور یہی دوہرا معیار صورتِ حال کو مزید خراب کرتا ہے۔
شہریوں نے مطالبہ کیا ہے کہ اس واقعے کی فوری اور شفاف تحقیقات ہوں، ملوث افراد کو سخت سزائیں دی جائیں اور ایسے مافیا کو روکا جائے تاکہ ریلوے کے ملازمین اور مسافر محفوظ رہ سکیں۔
متعدد افراد نے ریلوے پولیس اور دیگر قانون نافذ کرنے والے اداروں سے اپیل کی ہے کہ وہ بروقت کارروائی کریں اور بیہودہ طاقت کے غلط استعمال کا سخت انجام دکھائیں۔
