فن لینڈ اور سویڈن کی نیٹو میں شمولیت، ترکی نے حمایت کردی

میڈرڈ: ترکی نے یورپی عسکری اتحاد نیٹو میں فن لینڈ اور سویڈن کی شمولیت کی حمایت کی ہے جسے عالمی سطح پر حیرت کی نظر سے دیکھا جارہا ہے۔

تفصیلات کے مطابق ترک صدر رجب طیب اردوان نیٹو اتحادیوں کی جانب سے مختلف بیانات کے باوجود یوکرین کے خلاف روس کی جنگ کے جواب میں دونوں ممالک کی درخواستیں تسلیم کرنے سے انکار کیا تھا، تاہم گزشتہ روز ترک صدر نے اہم فیصلہ کیا۔

یہ بھی پڑھیں:

سعودی عرب میں ذوالحجہ کا چاند آج نظر آئے گا

ترک صدر رجب طیب اردوان نے سویڈن اور فن لینڈ کے رہنماؤں کے ساتھ طویل گفت و شنید کے بعد دونوں ممالک کی نیٹو میں شمولیت کی مخالفت ختم کرنے کا اعلان کیا۔ واضح رہے کہ ترکی کو نیٹو کا فیصلہ ویٹو کرنے کا حق حاصل ہے۔

نیٹو قواعد و ضوابط کے مطابق ترکی سمیت تمام اتحادی ممالک کا نئے اراکین کی شرکت پر رضامند ہونا ضروری ہے۔ گزشتہ شب دیر گئے ترک صدر کے دفتر کی جانب سے سویڈن اور فن لینڈ کے حق میں بیان جاری کیا گیا کہ ہمارے ملک کو جو چاہئے تھا، وہ مل گیا۔

صدر رجب طیب اردوان کے دفتر کی جانب سے جاری کردہ بیان میں نیٹو سربراہی اجلاس سے قبل کہا گیا کہ ترکی نے دہشت گرد تنظیموں کے خلاف جنگ میں نمایاں کامیابیاں حاصل کی ہیں۔ قبل ازیں فن لینڈ اور سویڈن پر مختلف الزامات عائد کیے گئے تھے۔

ماضی قریب میں ترک حکومت نے فن لینڈ اور خاص طور پر سویڈن پر کرد دہشت گردوں کو محفوظ پناہ گاہیں فراہم کرنے کا الزام عائد کیا تھا جو دہائیوں سے ترکی کے خلاف بغاوت اور مسلح حملوں میں ملوث رہے ہیں تاہم گزشتہ روز تمام تر گرد صاف ہوگئی۔

سویڈن اور فن لینڈ نے ترکی کو ہتھیاروں کی فراہمی پر عائد پابندیاں ہٹانے سے اتفاق کر لیا جو 2019 میں ترکی کی شام میں فوجی مداخلت کے جواب میں عائد کی گئی تھیں۔ فن لینڈ حکومت کے مطابق ترکی، فن لینڈ اور سویڈن نے ایک یادداشت پر دستخط بھی کیے۔