گوگل نیوز پر ہمیں فالو کریںبہاولنگر میں ایک افسوسناک واقعہ پیش آیا جہاں دو نوجوانوں نے خواجہ سرا کو مبینہ طور پر جنسی زیادتی کا نشانہ بنایا اور لوٹ مار بھی کی۔
پولیس کے مطابق متاثرہ خواجہ سرا شادی کی تقریبات میں پرفارم کرکے روزگار کماتا ہے اور 9 ستمبر کو اپنے گھر علامہ اقبال ٹاؤن میں موجود تھا جب چک 314ایچ آر کے دو افراد اسے شادی میں شرکت کی دعوت دینے کے بہانے وہاں پہنچے۔
میڈیا رپورٹس کے مطابق ایک ملزم نے خواجہ سرا کے ساتھ زیادتی کی جبکہ دوسرا پہرہ دیتا رہا۔ متاثرہ شخص کے شور مچانے پر قریبی رہائشی وہاں پہنچ گئے جس پر دونوں ملزمان نقدی، کاغذات اور موبائل فون چھین کر فرار ہوگئے۔
بعد ازاں پولیس ترجمان نے تصدیق کی کہ دونوں ملزمان کو گرفتار کرلیا گیا ہے اور ان کے خلاف مقدمہ درج کرلیا گیا ہے۔
یاد رہے کہ اس سے قبل بھی خواجہ سراؤں کے خلاف پرتشدد واقعات رپورٹ ہو چکے ہیں۔
جولائی میں کراچی کے اورنگی ٹاؤن میں 21 سالہ علی خان کو اس کے والد نے خواجہ سرا برادری سے تعلقات رکھنے پر قتل کردیا تھا۔
ایس ایچ او اقبال مارکیٹ شیر محمد کے مطابق، ملزم عبدالغفار خان کو گرفتار کرلیا گیا تھا جس نے اپنے بیٹے کو کدال کے وار سے قتل کیا تھا۔ ابتدائی تحقیقات میں انکشاف ہوا کہ والد اپنے بیٹے کی خواجہ سرا برادری سے دوستی پر شدید برہم تھا۔
