جامعہ کراچی خودکش بم دھماکہ، چینی باشندوں کی آخری رسومات آج ادا کی جائیں گی

جامعہ کراچی میں خود کش بم دھماکے میں جاں بحق چینی باشندوں کی آخری رسومات آج ادا کی جائیں گی جن میں شرکت کیلئے چینی شہریوں کے لواحقین پاکستان پہنچ گئے۔

تفصیلات کے مطابق گزشتہ ماہ خاتون خودکش بمبار نے جامعہ کراچی میں واقع کنفیوشس سینٹر کے باہر چینی اساتذہ کی گاڑی کو نشانہ بناتے ہوئے خود کو  دھماکے سے اڑا لیا جس کے نتیجے میں 3چینی شہریوں سمیت 4افراد جاں بحق ہوئے۔

یہ بھی پڑھیں:

جامعہ کراچی دھماکے کے خلاف کارروائی، ایم فل کا طالبعلم گرفتار

دھماکے کے نتیجے میں متعدد افراد زخمی بھی ہوئے۔ جاں بحق چینی باشندوں کی آخری رسومات آج کراچی میں ادا کی جائیں گی۔ دھماکے کا شکار گاڑی آگ لگنے کے باعث جل کر راکھ ہوگئی تھی۔ گاڑی کا ڈرائیور بھی جاں بحق ہوگیا۔ 

صدرِ مملکت ڈاکٹر عارف علوی، وزیر اعظم شہباز شریف اور چیئرمین پی ٹی آئی عمران خان چینی سفارت خانے پہنچے اور دھماکے کی مذمت کرتے ہوئے چینی باشندوں کی قیمتی جانوں کے ضیاع پر چینی عوام سے یکجہتی کا اظہار کیا۔

بعد ازاں دھماکے کی ذمہ داری کالعدم تنظیم بی ایل اے نے قبول کر لی۔ خاتون خودکش بمبار کی سی سی ٹی وی فوٹیج بھی سامنے آگئی۔ تینوں جاں بحق چینی باشندوں کے لواحقین آخری رسومات کی ادائیگی کیلئے کراچی پہنچ گئے ہیں۔