غیر شادی شدہ افراد میں دل کے مرض سے اموات کا خدشہ 58فیصد زائد

ماہرین کا کہنا ہے کہ شادی شدہ افراد کے مقابلے میں دل کے غیر شادی شدہ مریضوں میں اموات کا خدشہ 58 فیصد زیادہ ہوتا ہے۔

تفصیلات کے مطابق یورپی سوسائٹی آف کارڈیالوجی کے سائنسی اجلاس 2022 میں پیش کی گئی ایک تحقیق کے مطابق غیر شادی شدہ افراد اپنی بیماری کا مقابلہ کرنے میں کم پر اعتماد اور شادی شدہ افراد کے مقابلے میں سماجی اعتبار سے زیادہ مجبور ہوتے ہیں۔ اس فرق کی وجہ سے غیر شادی شدہ افراد کی زندگی کم ہوجاتی ہے۔

یہ بھی پڑھیں :

نیند کی کمی سے یادداشت متاثر ہوتی ہے۔ماہرین

سماجی تعاون مریضوں کو طویل مدتی حالات کا سامنا کرنے میں مددگار ثابت ہوتا ہے۔ تحقیقی نتائج تحریر کرنے والے مصنف ڈاکٹر فابیان کیروگن نے کہا کہ میاں بیوی منشیات سمیت دیگر منفی عادات چھڑانے میں ایک دوسرے کی حوصلہ افزائی کرتے اور صحت مندانہ طرزِ عمل کو فروغ دیتے ہیں جس سے عمر طویل ہوتی ہے۔

ڈاکٹر فابیان کیروگن نے کہا کہ مطالعے کے دوران غیر شادی شدہ مریضوں نے شادی شدہ افراد کے مقابلے میں کم میل جول اور گفتگو ظاہر کی جبکہ ان کے اندر دل کے مرض پر قابو پانے کیلئے درکار اعتماد بھی کم تھا۔ تحقیق میں 2004 سے 2007 کے دوران 1 ہزار 22 مریضوں کا جائزہ لیا گیا جن میں سے 633شادی شدہ تھے۔

تحقیق کے دوران 14 مریضوں نے اپنی ازدواجی حیثیت ظاہر نہیں کی جبکہ بچ رہنے والے 1008 مریضوں میں سے 633 شادی شدہ جبکہ 375 غیر شادی شدہ تھے۔ ان 375میں سے 195 کے شوہر یا بیویاں وفات پا گئیں، 96 ہمیشہ سے غیر شادی شدہ ہی رہے جبکہ 84 کو علیحدگی یا طلاق کے باعث اکیلے زندگی گزارنا تھی۔

محققین کا کہنا ہے کہ مریضوں کو سوالنامے مہیا کیے گئے اور مجموعی نتائج کے اعتبار سے مختلف حقائق سامنے آئے۔ زندگی کے مجموعی معیار یا افسردگی کے حوالے سے شادی شدہ اور غیر شادی شدہ مریضوں میں فرق نہیں تھا، تاہم غیر شادی شدہ افراد سماجی حدود اور خود افادیت کے معاملے میں بد تر ثابت ہوئے۔

آگے چل کر 10 سال میں 679 مریض وفات پا گئے۔ بعد ازاں اخذ کیے گئے نتائج سے پتہ چلا کہ غیر شادی شدہ افراد میں شادی شدہ مریضوں کے مقابلے میں اموات کا 58فیصد خدشہ زیادہ ہوتا ہے۔ ڈاکٹر فابیان کیروگن کا کہنا ہے کہ شادی اور لمبی عمر کے درمیان تعلق دل کے مریضوں کیلئے سماجی مدد کی اہمیت کی نشاندہی کرتا ہے۔