گوگل نیوز پر ہمیں فالو کریںایم ٹی وی روڈیز کے خالق راگھو رام نے دعویٰ کیا ہے کہ پاکستانی ریئلٹی شو کے سابق میزبان وقار ذکاء نے ان کے شو کو بغیر کاپی رائٹ اجازت کے ری برانڈ کیا۔
انڈین ایکسپریس کی رپورٹ کے مطابق راگھو رام کو پاکستانی شو “روڈیز” کے ایک کلپ کا حوالہ دیا گیا اور ان سے پوچھا گیا کہ کیا وہ اس بارے میں جانتے ہیں۔ انہوں نے وضاحت کی کہ وقار ذکا، جو “لیونگ آن دی ایج” کے میزبان تھے، نے اپنے شو کو “پاکستانی روڈیز” کے طور پر ری برانڈ کیا تھا۔
جب میں نے یہ دیکھا تو مجھے اندازہ ہوا کہ وہ اس برانڈ کو اپنانے کی کوشش کر رہے ہیں۔ میں نے اپنے باس کے پاس جا کر کہا ‘ان لوگوں پر مقدمہ کرو لیکن میرے باس نے جواب دیا، ‘ہم ایسا نہیں کر سکتے۔ ہم نے روڈیز کاپی رائٹ نہیں کروایا۔
راگھو رام نے بتایا کہ انہوں نے خود کاپی رائٹ لینے کی کوشش کی لیکن دو دن بعد معلوم ہوا کہ ایم ٹی وی نے تیزی سے کارروائی کرتے ہوئے کاپی رائٹ حاصل کر لیا۔”اگر وہ ایسا نہ کرتے، تو آج روڈیز برانڈ میرے پاس ہوتا اور میری زندگی بالکل مختلف ہوتی!”
راگھو رام نے اس غلطی کو ذاتی توہین قرار دیا لیکن مزاحیہ انداز میں اعتراف کیا کہ کاپی رائٹ رکھنے سے وہ زیادہ مالدار ہو جاتے۔
اگرچہ راگھو نے شو کو برسوں پہلے چھوڑ دیا تھا لیکن ایم ٹی وی روڈیز نے اپنا سلسلہ جاری رکھا ہے اور اب اپنے 20ویں سیزن کی تیاری کر رہا ہے۔ 2003 میں شروع ہونے والا یہ شو ایک ثقافتی مظہر بن گیا، جس نے رن وِجئے سنگھ، آیوشمان کھرانہ اور پرنس نرولا جیسے نمایاں شرکاء کو شہرت دی۔
دلچسپ بات یہ ہے کہ وقار ذکا ء نے راگھو رام کو ایک مشترکہ شو پر کام کرنے کی دعوت دی تھی لیکن یہ ممکن نہ ہو سکا کیونکہ راگھو رام وقت کی کمی کی وجہ سے دستیاب نہیں تھے۔
دوسری جانب “لیونگ آن دی ایج: سب سے ہمت والا کون؟” پاکستان کا پہلا ڈیر ریئلٹی شو تھا۔ اپنے منفرد اور جرات مندانہ مواد کی وجہ سے یہ پاکستانی گھریلو خواتین اور نوجوانوں میں سب سے زیادہ مقبول ہوا۔ اس شو کی ویڈیوز سوشل میڈیا پر وائرل ہوئیں اور یہ پاکستان کا سب سے زیادہ دیکھا جانے والا ریئلٹی شو بن گیا تھا۔
