گوگل نیوز پر ہمیں فالو کریںبھارت کے محکمہ موسمیات نے کہا ہے کہ جنوب مشرق اور اس سے ملحقہ جنوب مغربی بحیرہ عرب میں کم دباؤ کا علاقہ ایک ڈپریشن میں تبدیل ہو گیا ہے اور اس کے شدید طوفان میں تبدیل ہونے کا خدشہ ہے۔
بھارتی حکام کے مطابق ہمیں بارش یا تیز ہواؤں کے معاملے میں کسی بڑے اثر کی توقع نہیں ہے تاہم ہم نے ماہی گیروں کو انتباہ جاری کیا ہے کہ وہ اگلے چند دنوں تک سمندر میں نہ جائیں۔
یہ رواں سال بحیرہ عرب میں آنے والا دوسرا سائیکلونک طوفان ہے۔ بحر ہند میں آنے والے طوفانوں کے نام کے لیے بنائے گئے فارمولے کے مطابق اسے ’تیج‘ کہا جائے گا۔ اتوار کے روز اس کے مزید شدت اختیار کر کے سلطنت عُمان (مسقط) کے جنوبی ساحلوں اور اس سے ملحقہ یمن کی طرف بڑھنے کی پیش گوئی کی گئی ہے۔
بھارتی محکمہ موسمیات کے ایک اہلکار کے مطابق تیج کے گجرات پر اثر انداز ہونے کا خطرہ نہیں ہے۔
بھارتی حکام کے مطابق یہ طوفان اتوار تک مضبوط ہو کر شدید سمندری طوفان میں تبدیل ہو جائے گا اور عمان کے جنوبی ساحلی خطوں اور یمن کے قریبی علاقوں کی سمت بڑھے گا۔ اس کے باوجود یہ نوٹ کرنا ضروری ہے کہ طوفان کبھی کبھار اپنی رفتار کو بدل سکتے ہیں۔
واضح رہے کہ پاکستانی محکمہ موسمیات نے بھی اعلان کیا ہے کہ تیج طوفان سے پاکستانی علاقوں کو براہ راست کوئی خطرہ نہیں ہے۔
