گوگل نیوز پر ہمیں فالو کریںپاکستان سپر لیگ (پی ایس ایل) 11 کے 24ویں میچ میں سنسنی خیز مقابلہ دیکھنے کو ملا جہاں حیدرآباد کنگز مین نے راولپنڈیز کو 5 وکٹوں سے شکست دے کر ایک اور اہم کامیابی اپنے نام کر لی جبکہ راولپنڈی کی ٹیم مسلسل مشکلات کا شکار ہے اور 6 میچز کھیلنے کے باوجود ابھی تک فتح حاصل نہیں کر سکی۔
نیشنل اسٹیڈیم کراچی میں کھیلے گئے اس میچ میں حیدرآباد کنگز مین نے ٹاس جیت کر پہلے فیلڈنگ کا فیصلہ کیا جو بعد میں بہترین حکمتِ عملی ثابت ہوا اور ٹیم کو فائدہ پہنچا۔
پہلے بیٹنگ کرتے ہوئے راولپنڈی کی ٹیم پوری اننگز میں دباؤ کا شکار رہی اور مقررہ 20 اوورز میں 9 وکٹوں کے نقصان پر صرف 121 رنز ہی بنا سکی۔ سیم بلنگز نے 26 اور یاسر خان نے 24 رنز کے ساتھ نمایاں کارکردگی دکھائی۔
حیدرآباد کنگز مین کے بولرز نے شاندار کارکردگی کا مظاہرہ کیا، جہاں محمد علی اور حنین شاہ نے گھات لگا کر بولنگ کرتے ہوئے 3،3 وکٹیں حاصل کیں۔ ان کے علاوہ آصف محمود اور گلین میکسویل نے بھی ایک، ایک کھلاڑی کو آؤٹ کیا۔
ہدف کے تعاقب میں حیدرآباد کنگز مین نے پراعتماد آغاز کیا اور مطلوبہ 122 رنز کا آسان ہدف 17ویں اوور میں 5 وکٹوں کے نقصان پر حاصل کر کے میچ اپنے نام کر لیا۔
بیٹنگ میں کپتان مارنس لبوشین، کوشل پریرا اور عرفان خان نیازی نے اہم کردار ادا کیا اور ٹیم کی جیت میں کلیدی شراکت ڈالی۔
راولپنڈی کی بولنگ میں آصف آفریدی نے 2 وکٹیں حاصل کیں جبکہ بین سیئرز، محمد عامر اور سعد مسعود ایک، ایک وکٹ لینے میں کامیاب رہے۔
