گوگل نیوز پر ہمیں فالو کریںکراچی پولیس نے کوئٹہ سے کراچی آنے والی ایک مسافر بس میں کارروائی کرتے ہوئے ایک خاتون کو گرفتار کیا ہے جو اپنی 10 سالہ بیٹی کے اسکول بیگ میں منشیات چھپا کر لے جا رہی تھی۔
پولیس حکام کے مطابق معمول کی چیکنگ کے دوران ایک بچی کا اسکول بیگ مشکوک محسوس ہوا۔ تلاشی لینے پر کتابوں کے نیچے سے تقریباً 4 کلو منشیات برآمد ہوئی۔ پولیس نے فوری طور پر بچی کی والدہ بی بی ذاکرہ کو حراست میں لے لیا۔
ایس ایس پی کیماڑی نے بتایا کہ گرفتار خاتون اپنی بیٹی کے بیگ میں منشیات رکھ کر سفر کر رہی تھی تاکہ کسی کو شک نہ ہو۔ پولیس کے مطابق برآمد شدہ منشیات کراچی کے مختلف علاقوں میں فروخت کی جانی تھی۔
خاتون کو تھانے منتقل کر کے اس کے خلاف منشیات ایکٹ کے تحت مقدمہ درج کر دیا گیا ہے جبکہ بچی کو قانونی تقاضوں کے مطابق حفاظتی تحویل میں لے لیا گیا ہے۔
