بلوچستان میں بارشوں سے 65 افراد جاں بحق، پی ڈی ایم اے نے رپورٹ جاری کردی

 بلوچستان کے محکمہ پروونشل ڈیزاسٹر مینجمنٹ اتھارٹی (پی ڈی ایم اے ) نے صوبے میں مون سون کی حالیہ بارشوں سے ہونے والے نقصانات سے متعلق رپورٹ جاری کردی۔ بارشوں سےاب تک65 افراد کے جاں بحق ہونے کی تصدیق ہوگئی۔

پی ڈی ایم اے کی رپورٹ کے مطابق بلوچستان میں حالیہ بارشوں کے دوران مختلف واقعات میں کم از کم 65 افراد ہلاک ہوئے۔ مرنے والوں میں 19 مرد، 24 خواتین اور 22 بچے شامل ہیں۔

یہ اموات بولان، کوئٹہ، ژوب، دکی، خاصدار، کوہلو، کیچ، مستونگ، ہرنائی، قلعہ سیف اللہ اور سبی کے اضلاع میں ہوئیں۔

بارشوں کے دوران صوبے بھر میں 49 افراد زخمی جبکہ 730 سے ​​زائد مکانات کو نقصان پہنچا۔

یہ بھی پڑھیں:

خیبرپختونخوا کے مختلف اضلاع میں حادثات، 18 افراد جاں بحق

پی ڈی ایم اے نے امدادی اور بحالی سرگرمیوں کے بارے میں رپورٹ میں کہا ہے کہ متاثرہ اضلاع میں اب تک تقریباً 6,325 خیمے لگائے گئے ہیں۔ اسی طرح 3480 کمبل، 743 سولر لائٹس، 3600 پانی کی بوتلیں اور 2400 مچھر دانیاں متاثرہ اضلاع میں امداد کے لیے بھیجی گئیں۔

پی ڈی ایم اے کی جانب سے جاری کی گئی رپورٹ میں مزید کہا گیا ہے کہ 5000 سے زائد کھانے پینے کی اشیاء اور دیگر امدادی اشیاء بھی پہنچائی گئی ہیں۔