خیبرپختونخوا کے مختلف اضلاع میں حادثات، 18 افراد جاں بحق

عید الاضحیٰ کے موقع پر خیبرپختونخوا کے مختلف اضلاع میں حادثات کے نتیجے میں 18 افراد جاں بحق جبکہ متعدد زخمی ہوگئے۔

تفصیلات کے مطابق سوات کے سیاحتی علاقہ گبین جبہ میں گاڑی کھائی میں جاگری جس کے نتیجے میں 11 افراد جاں بحق ہوگئے۔ حادثے میں 3 افراد شدید زخمی ہوئے جنہیں ریسکیو 1122 کے اہلکاروں نے سیدوشریف اسپتال میں منتقل کردیا۔

ریسکیو 1122 کی ٹیم نے موقع پر پہنچ کر جاں بحق اور زخمیوں کو ہسپتال منتقل کیا۔ ریسکیو ذرائع کا یہ بھی کہنا ہے کہ 4 زخمیوں کی حالت تشویشناک ہے۔

دوسرا حادثہ مانسہرہ کے علاقے گڑھی حبیب اللہ میں پیش آیا جہاں جیپ گہری کھائی میں جاگری، جس کے نتیجے میں ایک ہی خاندان کی تین خواتین جاں بحق ہوگئیں۔

یہ بھی پڑھیں: اسلام آباد میں پیزا ڈلیوری کیلئے آنیوالے نوجوان سے زیادتی،مقدمہ درج

خیال رہے کہ جیپ سیاحوں کو مینگورہ سے مالم جبہ لے جارہی تھی کہ مانسہرہ کے قریب کھائی میں گرگئی۔ حادثے میں 5 افراد زخمی بھی ہوئے جنہیں بعد ازاں سول اسپتال گڑھی حبیب اللہ منتقل کردیا گیا۔

دوسری جانب بلوچستان کے سرحدی شہر چمن میں بھی اسی طرح کا ایک حادثہ پیش آیا، جہاں ایک گاڑی کھائی میں گرگئی جس کے نتیجے میں کم از کم 5 افراد جاں بحق اور 7 زخمی ہوگئے۔

حادثے کے بعد پولیس اور لیویز موقع پر پہنچ گئے اور جاں بحق اور زخمیوں کو اسپتال منتقل کیا گیا۔