عوامی رابطہ مہم، وزیر اعظم حافظ آباد میں جلسے سے خطاب آج کرینگے

اسلام آباد: وزیر اعظم عمران خان عوامی رابطہ مہم کے سلسلے میں حافظ آباد میں جلسے سے خطاب آج کریں گے جس کا مقصد تحریکِ عدم اعتماد سمیت ملک کے سیاسی و قومی مسائل پر روشنی ڈالنا ہے۔

تفصیلات کے مطابق وزیر اعظم عمران خان آج حافظ آباد میں پی ٹی آئی کارکنان اور عوام کے جمِ غفیر سے خطاب کریں گے جس کے دوران مہنگائی سمیت دیگر چیلنجز پر قابو پانے کیلئے پی ٹی آئی حکومت کی پالیسیاں عوام کے سامنے رکھی جائیں گی۔

یہ بھی پڑھیں:

دیوالیہ معیشت مستحکم،مہنگائی کم کرنے کی کوشش کر رہے ہیں، وزیراعظم

سماجی رابطے کی ویب سائٹ ٹوئٹر پر اپنے پیغام میں پی ٹی آئی کے سینیٹر فیصل جاوید خان نے کہا کہ حافظ آباد تیار رہے، منڈی بہاؤ الدین، میلسی اور دیر میں وزیر اعظم کے جلسے کامیاب رہے، اب وزیر اعظم حافظ آباد میں جلسے سے خطاب کریں گے۔

حافظ آباد تیار ہو! منڈی بہاوالدین,میلسی اور دیر کے کامیاب عوامی جلسوں کے بعد اب وزیراعظم عمران خان عوامی رابطہ مہم کے تحت کل بروز اتوار انشاءاللہ حافظ آباد میں جلسہ عام سے خطاب کریں گے-
عوام کاوزیراعظم پر بھرپور اعتماد-اپوزیشن تحریک عدم اعتماد عمران خان پر اعتماد پلس میں بدل گئی

— Faisal Javed Khan (@FaisalJavedKhan) March 12, 2022

ٹوئٹر پیغام میں سینیٹر فیصل جاوید خان نے کہا کہ وزیر اعظم اتوار کے روز عوامی رابطہ مہم کے تحت عوامی جلسے سے خطاب کریں گے، عوام وزیر اعظم پر بھرپور اعتماد کرتے ہیں۔ اپوزیشن کی تحریکِ عدم اعتماد عمران خان پر اعتماد پلس میں بدل گئی۔

گزشتہ روز وزیرِ مملکت برائے اطلاعات فرخ حبیب نے کہا کہ وزیر اعظم حافظ آباد کا دورہ کریں گے، وزیر آباد کی تاریخ کا سب سے بڑا جلسہ ہوگا۔ حافظ آباد میں ہسپتال اور یونیورسٹی بنائی جائے گی۔ حافظ آباد کا جلسہ کامیاب ثابت ہوگا۔